Estátua Don Boaventura iha Luak. Imajen Tatoli/Domingos Piedade Freitas

MANUFAHI, 28 outubru 2019 (TATOLI)—Jestaun ba Parke Nasionál Don Boaventura iha Luak, Manufahi, sei iha Ministériu Turizmu nia liman. Tan ne’e, Administradór Munisípiu Manufahi, Arantes Isaac Sarmento, husu atu fó kompeténsia ba sira hodi jere rasik parke refere.

“Ha’u hanoin kona-ba Parke Don Boaventura iha Luak, kompeténsia nafatin iha Governu sentrál liuliu iha Ministériu Turizmu nia liman hodi jere totalmente”, nia tenik ba Agência TATOLI, iha nia kna’ar fatin, edifísiu Administrasaun Manufahi, Suku Holarua, Postu Administrativu Same, Munisípiu Manufahi, segunda ne’e.

Nia hatutan, preokupasaun hirak ne’e, nia hato’o ona ba iha Ministériu relevante hanesan Sekretaria Estadu Arte Kultura no Meiu Ambiente inklui mós Diresaun Jerál Nasionál Turizmu nian, no hein katak proposta bele passa atu hahú ona serbisu balun.

Arantes hateten Administrasaun Munisípiu rejista ona Parke Nasionál Don Boaventura iha Planu Estratéjika Dezenvolvimentu Munisipál (PEDM). Iha planu ne’e, sei dezenvolve didi’ak Parke Don Boaventura tanba parke refere hanesan sentru turizmu ida-ne’ebé bele dada turista sira atu hatama rendementu ba Estadu.

Nia haktuir, komunidade entrega rai hamutuk ektare 23 iha Luak ba Estadu ho objetivu atu alarga parke ne’e sai fatin turístika, istórika no sagradu ba iha mundu.

“Atu asegura parke ne’e, Administrasaun Munisípiu koloka ona seguransa na’in haat iha fatin ne’ebá atu halo seguransa no kontinua halo limpeza nune’e ambiente parke bele moos nafatin”, Arantes haklaken.

Seidauk Aplika Kontribuisaun

Iha parte seluk, maski vizitante rai-laran no turista sira kada loron kontinua hala’o vizita ba Parke Nasionál Don Boaventura maibé Ministériu Turizmu seidauk aplika kontribuisaun ruma ba vizitante sira.

“Ami nu’udar seguransa sivíl observa kada loron vizitante kuaze na’in 100 ba leten mak vizita fatin ne’e. Maibé, sira la fó kontribuisaun ruma. Vizita gratuita. Tanba rona informasaun katak Ministériu Turizmu seidauk aplika kontribuisaun ba vizitante sira”, tenik nia ba Agência Tatoli iha Parke Nasionál Don Boaventura, ohin.

Feliciano haktuir katak aktu hosi vizitante sira kontinua hatudu disiplina hanesan la soe fo’er arbiru no la halo barullu iha fatin turístika, sagradu no istóriku ne’e.

Kona-ba fasilidade hanesan haris fatin, nia dehan,  di’ak ona maibé araska ba bee atu bele fasilita vizitante hirak ne’ebé mak hakarak soe fo’er boot no ki’ik.

Tuir jornalista TATOLI nia observasaun iha Parke Don Boaventura, katak projetu harii moru no uma ida iha parke refere kaer hosi Kompañia Los Kabubu Unipessoal LDA maibé abandonadu hela lahó razaun fundamentu. Observasaun mós hatudu katak lampu balun iha parke ne’e komesa aat ona maibé Administrasaun Munisípiu Manufahi labele halo buat ruma tanba laiha kompeténsia atu rezolve.

Don Boaventura, nu’udar liurai Manufahi iha portugés nia ukun iha Timor. Durante nia kargu nu’udar Liurai, nia iha estratéjia atu duni sai malae mutin sira hosi Timor. Hanesan hatutan nia aman Don Duarte ninia dalan, Don Boaventura luta kontra kolonialzmu portugés hodi hamosu “Funu Manufahi”.

Bainhira Don Boaventura lidera funu Manufahi, iha kauza balun maka hamosu kontinuidade funu ne’e ho ninia komplesidade rasik. Ida maka desizaun governadór foun Filomeno de Câmara de Mello hasa’e folin impostu perkapita. Ida-ne’e afeta kedas povu nia moris sai todan liu, liuliu ezijénsia governu Porrtugal atu aumenta númeru ema ba serbisu públiku nian no ba plantasaun kafé nian.

Don Boaventura maski hetan edukasaun europeu hosi eskola misaun Katólika, Lahane, tinan 1895, maka bolu hikas hosi povu Manufahi atu hatutan ninia aman Don Duarte nia luta, maibé dala ida tan laiha dokumentasaun forte ne’ebé fó roman kona-ba Don Boaventura ninia ideia, kona-ba liberdade ka ukun rasik-aan, inklui mós nia apoiante asimiladu sira.

Agora daudaun, iha ona monumentu ida nu’udar omenajen hosi Estadu Timor-Leste no sidadaun sira ba erói Don Boaventura mak “Estátua Don Boaventura” ne’ebé harii iha tinan 2012 iha Luak, Postu Administrativu Same, Munisípiu Manufahi.

Jornalista: Domingos Piedade Freitas

Editór: Xisto Freitas

1 KOMENTÁRIU

  1. Jornalista husu kona ba dokumentasaun Don Boa Ventura nia luta hasoru kolonialista portugues, maibe ita tengki hatene katak iha tempo defisil atu halo dokumentasaun hanesan agora, maibe ita bele hatene istoria Don Boa Ventura ho verbalmente, no ita tengki orgulho tamba iha Timor oan nebe brani hanesan Don Boa Ventura nebe Brani kontra kolonialista Portugues.

HAKEREK NO HATÁN

Please enter your comment!
Please enter your name here