Membru Komisaun organizadora ba komemorasaun tinan 30 prezensa Papa João Paulo II, Padre Martinho Gusmão. Imajen/Cipriano Colo

DILI, 29 outubru 2019 (TATOLI) – Prezidente Repúblika (PR), Francisco Guterres ‘Lu Olo’, sei partisipa misa agradesimentu tinan 30 prezensa Papa João Paulo II, loron 12 outubru 1989, iha Tasi Tolu.

Membru Komisaun organizadora ba komemorasaun loron istóriku ne’e, Padre Martinho Gusmão, hateten Xefe Estadu sei hato’o mensajen iha misa.

“Ami konvida Prezidente Repúblika atu aban partisipa iha misa atu hato’o mós mensajen konabá Santu Padre nia vizita”, Padre Martinho hafoin halo audiénsia ho Xefe Estadu iha Palásiu Prezidensiál, Bairru Pité, tersa ne’e.

Tuir nia, akontesimentu ne’e importante tanba ba dahuluk joven Katólika no eskuteiru sira hamriik atu halo demostrasaun.

“Ida-ne’e demostrasaun dahuluk hafoin demostrasaun iha tinan 1974, bainhira joven sira hamriik atu deklara ukun rasik-aan, hanesan Nicolau Lobato, Francisco Xavier do Amaral, Sahe, Maulear. Kuandu sira hamriik atu halo demostrasaun iha 1974, to’o fali 1989 maka foin akontese tan demostrasaun ida”, Padre konta tuir.

Nia dehan, tinan ne’e Timor-Leste selebra tinan 20 referendum no mós tinan 30 vizita Papa João Paulo II, ne’ebé hanesan akontesimentu istóriku ne’ebé marka resurjimentu ba timoroan hotu ninia konsiénsia nasionál atu ukun rasik-aan.

Iha misa ne’e, sei marka prezensa sarani sira husi Dioseze Dili, Baucau no Maliana, joven, no Vigáriu Jerál Arkidioseze Pontianak Kalimantan, Dioseze Atambua no Bispu husi Darwin reprezenta Igreja Katólika Austrália.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here