Ofisiais Polisia Nasional Timor-Leste halao destrisaun hodi sunu droga kokaina kilograma rua ne’ebé parte PNTL prende iha Aeroportu Prezidente Nicolau Lobato, Comoro, Dili iha tinan 2012. Imajen/Antonio Goncalves

TIBAR, 28 outubru 2019 (TATOLI)- Polísia Nasionál Timor-Leste (PNTL) liuhosi seksaun Servisu Investigasaun Kriminál Nasionál (PNSIK) halo destruisaun ba materiál droga ho tipu kokaína kilograma rua.

Nee mak droga kokaina kilograma rua ne’ebé PNTL halo destroisaun iha Tibar . Imajen/Antonio Goncalves

Kazu esporta materiál droga tipu kokaina ne’e importa liuhosi Kolomabia mai Timor-Leste liuhosi sidadaun Indonézia na’in rua ho inisiál EP (mane) no HH (feto) ne’ebé autoridade seguransa kaer iha Aeroportu Prezidente Nicolau Lobato, Comoro, Dili, iha tinan 2012 liubá.

Atividade destruisaun ne’e, PNSIK hala’o iha sesta (25/10/2019), iha Sentru Prosesamentu Lixu Tibar, Postu Administrativu Bazartete, Munisipiu Liquiça, bazeia ba  despaxu Tribunál Distritál Dili (TDD) katak, kazu ne’e nia prosesu finál ona.

PNSIK konsidera kazu materiál droga ho tipu Kokaína kilograma rua liu ne’e foin primeira vés maka lori mai Timor-Leste iha tinan 2012 ho kuantidade boot tama hosi Aeroportu Internasionál Prezidente Nicolau Lobato hosi Denpasar-Indonézia.

Ofisiais Polisia Nasional Timor-Leste halao destrisaun hodi sunu droga kokaina kilograma rua ne’ebé parte PNTL prende iha Aeroportu Prezidente Nicolau Lobato, Comoro Dili, iha tinan 2012. Imajen/Antonio Goncalves

Kazu ai-moruk droga ne’e rejistu no NUK 0098/12/PNSIK lori mós arguido na’in rua; EP no HH kumpre ona sira nia sentensa iha komarka ho tinan tolu ho balun.  Tanba suspeitu rua lori ai-moruk hatama mai ho modus opranding, hatama iha kopu laran no falun ho jornál inklui balun falun ho surat tahan alumíniu meius oi-oin, maibé parte PNTL konsege deteta.

Bainhira parte PNTL prende ai-moruk ne’e, eis Primeiru-Ministru Kay Rala Xanana Gusmão mós tun direita iha terrenu hamutuk ho PNTL halo kedas identifikasaun ba materiál kokaina hirak ne’ebé ema lori tama hosi Aeroportu Prezidente Nicolau Lobato.

Iha altura ne’ebé, Kay Rala Xanana Gusmão konsidera seguransa iha Aeroportu Prezidente Nicolau Lobato, frajil tebes, tanba kada tinan autór droga sira sempre lori ai-moruk droga mai Timor-Leste.

Xanana mós husu atu parte Alfándega no Polisia sira tenke halo serbisu matan moris hodi pasa revista kualkér sasán kontra badu sira ne’ebé ema lori tama mai Timor-Leste hanesan ai-moruk droga perigozu tebes bele estraga joven Timor-oan sira nia futuru bainhira konsumu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here