Lansamentu livru.

DILI, 28 outubru 2019 (TATOLI)—Hakerek kriativu haree liu ba mentalidade kriativu. Mentalidade atu rezulta buat ne’ebé diferensa husi ema seluk. Diferensa tanba la baibain. Tanba kreativu ne’e poténsia. La’ós kestaun kreatividade ne’e ki´´ik ka boot. Maibé meius oinsá ita deskobre no hala’o poténsia kreativu ne’ebé ita iha.

Poténsia kreativu ne’e hatudu husi eskritór livru ”Loron Ne’ebé  Esperansa no Istória Rima iha Timor-Leste”, Pat Walsh, tanba ba nia hakerek hanesan arte atu espresa ideia ka sentimentu liuhusi hakerek, hanesan loloos pintór ida hato’o ninia ideia no sentimentu iha ninia pintura sira. Tuir planu, livru ne’e sei lansa iha Segunda ohin (28 outubru 2019, tuku 16.30 lorokraik, iha Xanana Gusmão Reading Room).

Livru ida ne’e nu’udar livru ida ne’ebé engrasadu uitoan (kómiku) maibé mós sériu. Tanba, istória hirak ne’ebé deskreve iha livru ne’e nia laran, mesak esperiénsia ne’ebé eskritór enfrenta iha nia moris bainhira serbisu iha Timor-Leste mak hanesan; Esperiénsia eskritór ho taxi iha Dili, eskritór ninia fatin pasear favoritu, labarik liurai ida no ninia tristeza ba mikrolete sira iha Dili mak la furak tan ona.

“Ha’u-nia livru ne’e hanesan kolesaun husi istória oin-oin. Iha Kapítulu 28, istória hotu-hotu mesak badak, iha istória kómiku no istória sériu. Ezemplu, iha istória kona-ba ha’u-nia partisipasaun iha loron istórika Referendu ka Konsulta Populár 1999. Iha livru laran ne’e, iha mós poezia kona-ba Timor-Leste,” dehan Eskritór Livru ”Loron Ne’ebé  Esperansa no Istória Rima iha Timor-Leste”, Pat Walsh, ba Ajénsia TATOLI liuhusi entrevista via rede sosiál (fb), segunda (28/10/2019).

Eskritór ne’e hakerek no fó apresiasaun katak personalidade timorense forte tebes hanesan Kuda Pónei husi foho Timor. Livru ne´e mós hato´o eskritór ninia observasaun kona-ba sofrementu hamlaha kauza husi okupasaun Indonézia, semitériu funu Indonézia nian iha Dili, luta feto timorense na’in tolu, no masakre ida iha Latvia ne’ebé mak ninia istória hanesan ho Timor-Leste.

“Ha’u hakerek livru ne’e, ha’u espera bele inspira timoroan sira hakerek kona-ba sira-nia esperiénsia rasik. Tansá mak ha’u hakerek? Tanba ha’u gosta atu hakerek no apoiu ema Timor-Leste no fó ba sira ezemplu hakerek kreativu (creative writing) no fahe informasaun kona-ba istória Timor-Leste ba ema hotu-hotu,” dehan eskritór ne’ebé iha tempu kle´ur serbisu iha Timor-Leste ne’e.

Livru refere, tuir eskritór, nia pájina hamutuk 286 ne’ebé imprime husi impresaun Kepustakaan Populer Gramedia (KPG) Jakarta, Idnonézia. Livru ne’e ninia versaun Tetun tradús husi eskritór nia oan feto rasik, Mayra Walsh, ne’ebé hetan apoiu husi timoroan, Isidoro Correia.

“Versaun dalen Malaiu ‘Hari Harapan dan Sejarah Rhumed di Timor-Leste’ lansa tiha ona iha serimónia Ubud Writers and Readers Festival iha Ubud, Bali, Indonézia, iha Kinta (24 Outubru 2019) ne’ebé lansa husi Andreas Harsono. Versaun Inglés ‘The Day Hope And History Rhimed in East Timor’ lansa tiha ona iha Kuarta (28 Agostu 2019) no ohin (Segunda, 28 Outubru 2019) ne’e sei lansa husi Jerente Xanana Gusmão Reading Room, Gaspar Freitas,” nia informa.

Antes atu halo lansamentu ba livru refere ne’ebé hala’o iha Xanana Reading Room, nia informa, iha parte dadeersan nia sei halo promosaun no halo diskusaun kona-ba livru refere iha Universidae da Paz (UNPAZ) iha tuku 10.00 dadersan no iha Dili International School iha tuku 13.30.

Iha Tersa (29 Outubru 2019) tuku 10.00 dadeersan, nia sei halo diskusaun ba livru refere iha Centro Nacional Chega! (CNC) iha Antigu Komarka, Balide, Dili, no sei halo diskusaun no reflesaun iha Universidade Nacional Timor Lorosa´e (UNTL) iha Auditoriu Liceu, Dili, iha tuku 16.30 lorokraik. Aleinde ne’e, iha fulan ida ne’e nia laran, eskritór mós sei halo promosaun ba ninia livru iha Baucau liuliu iha Postu Administrativu Laga no Venilale.

Kona-Ba Eskritór

Pat Walsh serbisu iha Timor-Leste entre tinan 1999-2010. Hafoin tempu naruk ajuda Organizasaun Naun Governamentál (ONG) Timor-Leste harii fila fali no hola papel hodi dezenvolve Timor-Leste. Nia serbisu iha Timor-Leste hodi ajuda programa rekonsiliasaun Timor-Leste no ajuda komunidade lokal ua’in hodi harii uma ba ema kbiit laek sira iha Dili liuliu iha parte Comoro, Kampung Baru.

Hetan apoiu husi Organizasaun Nasaun Unidas (ONU), nia ajuda harii no sai konsilleiru ba Komisaun Simu Malu, Lia-Loos no Rekonsiliasaun, A Comissão de Acolhimento, Verdade e Reconciliação (CAVR) hahú husi 2001-2005. Hafoin CAVR taka, nia nafatin simu knaar nu’udar konsilleiru ba Secretariado Tecnico Pos-CAVR (STP-CAVR) ne’ebé hetan apoiu husi Governu Irlandia no Trocaire.

Iha tinan  2009, nia simu medalla Ordem de Timor-Leste husi Prezidente da Repúblika tanba ninia kontribuisaun hodi serbisu ba Timor-Leste no hala’o serbisu umanidade. Nia hanesan fundadór ba Jornál INSIDE INDOENSIA iha tinan 1983 no durante tinan barak nia asume kargu nu’udar Diretór Edifisiu Direitu Umanu (Hak Asasi Manusia) Konsellu Austrália ba Apoiu Estranjeiru agora sai Australian Council for International Development (ACFID) ne’ebé ninia foku rejionál ba Timor-Leste no Indonézia.

Daudaun ne’e, nia hela iha Melbourne-Australia hamutuk ho nia espoza, Annie Keogh, ne’ebé espertu ba parte vokasionál durante iha Timor-Leste. Ninia oan feto na’in tolu, Suzannah, Mayra, no Patricia konsege eskola iha Indonézia no hela ka serbisu iha Timor-Leste iha tempu ne’ebe diferente.

Jornalista: Cancio Ximenes

Editór       : Rafy Belo

HAKEREK NO HATÁN

Please enter your comment!
Please enter your name here