Koordenadora Unidade Planeamentu, Monitorizasaun no Avaliasaun, Brigída Soares.Imajen TATOLI/Egas Cristovão

DILI, 28 outubru 2019 (TATOLI) – Grupu Organizasaun ba Kooperasaun no Dezenvolvimentu Ekonómiku (OECD-Organisation for Economic Cooperation and Development) iha segunda ne’e, hala’o sorumutu ho Primeiru-Ministru (PM), Taur Matan Ruak, hodi aprezenta sira nia misaun servisu ne’ebé sei hala’o iha Timor-Leste, liuliu atu halo avaliasaun roteiru orsamentasaun ba futuru sustentável.

“Organizasaun ida ne’e, ninia objetivu servisu atu maka haree liubá oinsá atu halo avaliasaun ba implementasaun hosi ita ninia roteiru orsamentasaun ba futuru sustentável ka orsamentasaun programátika ne’ebé maka Governu halo,” tenik Koordenadora Unidade Planeamentu Monitorizasaun no Avaliasaun (UPMA), Brígida Soares iha Paláciu Governu.

Nia haktuir, tinan kotuk OECD mai ona iha Timor-Leste hodi haree oinsá Governu dezenvolve no sira husu ezekutivu sira atu nafatin halo estrutura programátika ne’ebé maka di’ak.

“Entaun ba tinan ida ne’e, Governu konsege halo ezersísiu kompleta ba implementasaun estrutura programátika ba entidade hamutuk 86, inklui entidade Estadu, entidade munisipalidade no mós Zona Espesiál Ekonómiku Sosiál Merkadu (ZEESM)”, nia akresenta.

Koordenadora ne’e subliña, hosi estrutura programátika ida ne’e sei hahú hosi 2020-2021 no Governu sei foku iha programa 137.

“Uluk ita la ko’alia ba programa maibé agora ba tinan oin nian, ita sei ko’alia kona-ba programa. Entaun Governu sei iha hotu programa hosi entidade hamutuk 86 no ida ne’e maka ekipa mai hodi haree implementasaun sira ne’ebé ita hala’o, hodi la’o tuir dalan ona ka lae, no saida maka ita presiza hadi’a tan ba tinan oin atu halo di’ak liután tuir Governu nia programa ba tinan sira tuir mai,” Brígida dehan tan.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here