Reprezentante veteranu, Juventude no komunidade husi munisípiu Viqueque, halo audiénsia ho Prezidente Repúblika (PR), Francisco Guterres ‘Lu Olo’. Imajen/ Mídia PR

DILI, 28 outubru 2019 (TATOLI) – Reprezentante veteranu, Juventude no komunidade husi munisípiu Viqueque, halo audiénsia ho Prezidente Repúblika (PR), Francisco Guterres ‘Lu Olo’, atu hato’o preukupasaun no ezijénsia, atu bele transforma Sentru Saúde internamentu Viqueque ba Ospitál Munisipál. 

Reprezentente komunidade ne’e hato’o preukupasaun ne’e, bazeia ba númeru transferénsia pasiente husi Sentru Saúde Internamentu ne’ebé kada tinan sempre aumenta.

“Tinan kotuk ita transfere pasiente mai ospitál Referénsia Baucau hamutuk 800, no tinan ne’e númeru transferénsia aumenta ba 900. Ida ne’e mós ita seidauk taka ho tinan ne’e nia rohan”, tenik Portavós Reprezentante Komunidade Viqueque, Octávio Sequeira, ne’ebé hanesan mós médiku no koordenadór Sentru Saúde Internamentu Viqueque, hafoin hala’o audiénsia iha Palásiu Prezidensiál, Bairro Pité, segunda ne’e.

Médiku ne’e esplika, tuir planu estratéjiku ne’ebė Ministériu Saúde halo ona desde Governu dahuluk katak, kada abitante ka populasaun iha kada munisípiu, iha direitu atu hetan Ospitál munisipál ida.

Nune’e mós, nia dehan jeografikamente Viqueque bele kobre mós área balun husi munisípiu sira seluk ne’ebé besik liu.

Octávio mós informa katak, ekipa ne’e lori proposta eskrita ida ba Xefe Estadu no sei entrega mós ba Primeiru-Ministru, Taur Matan Ruak, ba Parlamentu Nasionál no mós karta ida sei haruka direta ba Munistériu Saúde.

Konabá proposta ne’e, Octávio hateten, PR Lú Olo simu ona, maibé laiha kompeténsia atu foti desizaun, tanba ezekutór (Governu) sira mak iha kompeténsia másimu atu bele deside.

Nia dehan tan, kona-ba dadus transferénsia pasiente katak, durante ne’e pasiente ne’ebé transfere husi Viqueque ho núneru aas liu maka labarik kiik-oan ho moras infesaun no tuir fali maka ema boot ho moras laran.

Octávio hatutan, komunidade mós ezije atu iha tempu badak, Governu tenke koloka urjente espesialista na’in-tolu maka hanesan pediatria, internista no espesialista ida ba kuidadu inan ho oan bainhira partu

Daudaun ne’e, iha Sentru Saúde Internamente Viqueque, iha médiku jerál na’in-neen, ida iha maternidade, na’in-haat iha internamentu, no ida koordenadór ne’ebé atende iha sala emerjénsia.

Entretantu, munisípiu Viqueque iha sentru Saúde internamentu ida, Sentru Saúde Lima iha postu administrativu Viqueque Vila, Ossu, Uatulari, Uatukarbau, no Lakluta.

Munisipiu Viqueque mós iha Postu Saúde 43, ne’ebé lokaliza iha suku sira ne’ebé pertense ba munisípiu ne’e rasik.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here