BAUCAU, 28 outubru 2019 (TATOLI)-Xefe Suku Abu, Postu Administrativu Quelicai, Munisípiu Baucau, Agostinho Freitas, orgullu ho kapasidade inan feto na’in haat ne’ebé sai lia na’in iha Suku Abu.
Notísia Relevante :Konsellu Suku Sira iha Baucau Uza Lei Tradisionál Halo Mediasaun
“Iha ami-nia Suku Abu iha lia na’in feto hamutuk nain haat. Aldeia Cairedo na’in ida, Aldeia Damena no iha Aldeia Liir na’in ida,” hatete Xefe Suku Agostinho Freitas ho orgullu ba jornalista, ohin, hafoin tuir programa konsulta públika kona-ba Lei Kostumeiru ho Justisa Tradisionál iha salaun Autoridade Munisípiu Baucau.
Nia dehan, inan feto na’in haat iha duni kapasidade no esperiénsia hodi lidera no sai mediadór ba problema no disputa ne’ebé akontese iha suku laran.
“Ha’u pesoál orgullu tebes ho feto sira nia kapasitasaun. Ho Ida ne’e ha’u husu ba futuru sai nafatin lia nain feto ne’ebé forte no promove-an nafatin hodi feto kontribui ba suku no nasaun,” hateten Agostinho Freitas.
Nia sujere ba Governu liuhosi Sekretaria Estadu Igualdade no Inkluzaun (SEEI) atu fó formasaun ba lia na’in feto sira atu aumenta no haforsa liu tan sira abilidade.
Jornalista : Osória Marques
Editór : Francisco Simões
