Rotunda Same Vila, Munisípiu Manufahi. Imajen espesiál

MANUFAHI, 28 outubru 2019 (TATOLI)Komunidade Manufahi ne’e komunidade ne’ebé iha konsiénsia. Sira respeita malu. Tanba ne’e, kuandu sira halo problema, anaunser sira la domina-aan ona.

Estabilidade sei la atinjidu liuhusi violénsia, maibé atinje liuhusi kompriensaun. Iha rai Manufahi, rai Don Boaventura nia horik fatin, komunidade hanai prinsípiu ida-ne’e. Sira la mai ho violénsia. Sira sai solusaun ba violénsia.

Tanba, ba sira, estabilidade tenke mai hosi ema ida-idak nia aan rasik. Wainhira ema ida-idak bele fó hakmatek ba nia aan, sei bele moris hakmatek ho ema seluk.

“Komunidade Manufahi ne’e komunidade ne’ebé iha konsiénsia. Sira respeita malu. Tanba ne’e, kuandu sira halo problema, anaunser sira la domina-aan ona,” Adjuntu Komandante Polísia Munisipál Manufahi, Superintendente Asistente, Domingos Gregório Soares, ba Agência Tatoli iha nia kna’ar fatin, Postu Administrativu Same, Munisípiu Manufahi, segunda ne’e.

Komunidade nia kompriensaun ne’e, halo autoridade seguransa la ulun moras. Polísia nia alvu la’ós ona halo atuasaun ba problema violénsia maibé foku ba asuntu seluk hanesan dezastre tráfegu no dezastre naturál.

“Karater hosi komunidade munisípiu lahanesan. Iha fatin balun tanba líder ne’e mak másimu liu entaun sira rona mak líder ne’e. Maibé, fatin balun lae. Iha Manufahi, joven sira edukadu no disiplina,” Domingos katak.

Adjuntu Komandante Polísia ne’e lakohi dada lia ne’e sai naruk. Nia ko’alia badak de’it. Husu juventude tenke prepara-aan tanba futuru rai “Ablai Ludu Rae Dlai” ne’e iha Manufahi oan nia liman.

Entretantu, Administradór Munisípiu Manufahi, Arantes Isaac Sarmento, orgullu ho Manufahi oan sira-nia hahalok. Tuir nia, komunidade Manufahi nia kontribuisaun hodi kria estabilidade, fó implikasaun pozitiva ba dezenvolvimentu Manufahi. Manufahi atinje ona dezenvolvimentu iha área balun.

“Pursentu 75 (%75) komunidade Manufahi hahú hosi área rurál to’o área urbana asesu ona ba bee-moos no estrada kuaze di’ak hotu ona,” Arantes haktuir ba Tatoli iha nia kna’ar fatin, segunda ne’e.

Nia mós hateten komunidade rasik hahú sente sai na’in ba rai Manufahi tanba setór privadu sira harii otél, produsaun aihan, haki’ak animál no grupu agrikultór atu dezenvolve Betano sai fatin agríkola.

Aleinde ne’e, administradór ne’e afirma, Administrasaun Munisipál mós mellora ona serbisu funsionáriu públiku. Katak, funsionáriu ne’ebé la kumpre devér, sei hetan sansaun.

“Ami kria mós atividade desportiva ho naran Kopa Manufahi ho sintidu kria amizade no fini ba futebolista,” Arantes tenik.

Nune’e mós, nia haktuir, nia hamutuk ho ekipa finaliza ona Planu Estratéjiku Dezenvolvimentu Munisipál (PEDM) oinsá atu dezenvolve Manufahi iha setór oioin. Planu ida ne’e, nia sei entrega ba Konsellu konsultivu Munisipál iha 31 outubru atu hetan aprovasaun.

Arantes salienta, Administrasaun Manufahi mós kria programa livre lixu. Ohin loron, Manufahi iha ambiente ne’ebé saudavél, livre ona husi fo’er-boot tanba ema hotu-hotu iha ona sintina liuhusi tulun hosi parseiru dezenvolvimentu.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here