Xefe Departamentu Sinál no Tráfiku Diresaun Nasionál Transporte no Terrestre (DNTT), João Eugénio da Silva. Foto/Natalino Costa.

DILI, 28 outubru 2019 (TATOLI) – Atu prevene asidente no engarrafamentu iha Dili laran maka Diresaun Nasionál Transporte no Terrestre (DNTT) foti desizaun hodi aplika tan sentidu úniku hosi estrada diresaun Kolmera bá Liseu (Rua São Sebastião), tanba antes ne’e aplika sentidu rua.

“Ami ohin foti desizaun liuhosi karta ida hodi aplika sentidu úniku hodi tau sinál katak husi Diresaun lampu merah Ministériu Justisa nian tun mai, bandu ona hodi labele fila ba liman karuk hodi bá mosu fali iha Kolmera, maibé tenke mai loos de’it Liseu nian”, dehan Xefe Departamentu Sinál no Tráfegu, Joao Eugenio da Silva, ba Ajénsia Tatoli iha nia knaar fatin, Balidi, ohin.

Iha área diresaun Kolmera bá mosu iha Liseu ne’e konsidera kloot loos, ema para karreta ho motór iha ne’ebá, entaun haree ba dalan kloot, nune’e mosu engarrafamentu, tanba ne’e DNTT deside halo sentidu úniku, atu hosi semáforu (lampu merah) Ministériu Justisa nian labele tama ba liman karuk hodi mosu iha Kolmera, maibé mai loos de’it Liseu nian.

“Sentidu úniku ne’e ami halo husi Kolmera mai iha Liseu, maibé kuandu husi lampu merah tun mai Ministériu Justisa nian, mai los de’it Liseu nian labele foti liman karuk, enkuantu motorista balun maka hakarak liuhosi ne’e maka viola regra tránzitu”, katak João Eugenio.

Tanba ne’e, DNTT husu ba ema hotu nian konxiénsia atu tau atensaun ba sinál hirak ne’ebé estabelese ona. Nune’e mós bá oin, DNTT sei haree hodi halo estudu kle’an ba dalan hirak ne’ebé presiza aplika tan sentidu úniku, nune’e bele prevene engarrafamentu no asidente iha kapitál.

“Ami sei haree tan dalan balun ne’ebé iha kapitál tanba presiza aplika sentidu úniku, entaun ami sei halo, maibé sei estudu kle’an antes foti desizaun ba kestaun ne’e, nune’e bele prevene engarrafamentu”, dehan nia.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here