Xefe Bankada Partidu Demokrátiku, António da Conceicão. Imajen António Goncalves

DILI, 28 outubru 2019 (TATOLI) – Xefe Bankada Partidu Demokrátiku (PD), António da Conceição, konsidera Eleisaun Antesipada la’ós dalan atu solusiona problema tanba durante ne’e povu mós akompaña lala’ok polítiku iha rai-laran no sira hatene saida maka di’ak.

“Buat ne’ebé maka ami hakarak atu aviza antisipadamente katak forsa polítika maka ida-ne’e no sei laiha forsa maiór ida tan bainhira iha Eleisaun Antesipada. Sei iha maka oin foun iha Parlamentu Nasional (PN), ne’ebé sei hanaruk tan buat ne’ebé maka divia ser ita konsolida ona iha ukun rasik-aan, maibé ita lori buat foun hodi baralla sasan ne’ebé la’o di’ak ona. Tanba ne’e ami aviza atu tetu didi’ak, tanba Eleisaun Antesipada la’ós dalan atu solusiona problema”,  tenik Deputadu ne’e ba Agência Tatoli, iha resintu PN, segunda ne’e.

Deputadu António ko’alia asuntu ne’e, relasiona ho deklarasaun Primeiru-Ministru, Taur Matan Ruak, katak bainhira laiha dalan atu rezolve membru governu pendente, karik bele hakat ba Eleisaun Antesipada.

Notísia Relevante: Laiha Dalan ba Membru Governu Pendente, Bele ba Eleisaun Antesipada

Tuir Deputadu ne’e, nu’udar Xefe Governu iha direitu halo deklarasaun maibé pronunsiamentu finál sei iha Prezidente Rupúblika ninia liman.

“Ba ami sira ne’ebé maka agora daudaun tuur hanesan opozisaun, ida-ne’e sai fali kestaun ba ami. Ami hatene katak eleisaun tinan ida dala ida, la’ós halo fulan rua ka tinan rua hanesan agora daudaun ne’e”, nia akresenta.

Nune’e nia apela, ba bloku Aliansa Mudansa ba Progresu (AMP), ne’ebé forma husi partidu CNRT, PLP no KHUNTO, tenke iha maturidade atu ko’alia ba malu tanba koligasaun ne’e maka agora daudaun forma VIII Governu Konstitusionál.

“Husi Bankada Oposizaun hakarak AMP tenke solusiona problema Governu nian, maibé bainhira AMP hakarak atu ba Eleisaun Antesipada entaun bloku ne’e rasik maka lakohi instituisaun sira ne’e funsiona ho di’ak”, nia lamenta.

Eis governante ne’e hatutan: “Bainhira seidauk solusiona estrutura governu, ami-nia deklarasaun sei prevalese. Vota kontra ka la’e la’ós solusaun ida ba posizaun ida nian problema, maibé importante maka tenke solusiona estrutura governu. Tanba ne’e ami husu AMP tuur hamutuk hodi rezolve problema ne’e”.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here