Ofisiais PNTL investiga visitor ne'ebé lori serveja tama Parlamentu. Imajen/Antonia Maia

DILI, 28 outubru 2019 (TATOLI)-Membru Polisia Korpu Seguransa Pesoál (CSP-sigla inglés) ho Diresaun Nasional Seguransa Patrimóniu Públiku (DNSPP) Parlamentu Nasionál, ohin dadeer,  la autoriza vizitante ida ho inisiál BSM tama ba arredores Parlamentu Nasionál, tanba lori serveja iha pasta laran.

Visitór lori serveja tama Parlamentu. Imajen/Antonia Maia

Komandante CSP Parlamentu Nasionál, Inspetór Alexandrino da Costa dehan, tuir regra seguransa nian iha Parlamentu Nasionál bandu kualkér vizitante halo vizita ba Parlamentu Nasionál atu lori tua ka serveja inklui sasán kro’at sira. Nune’e, PNTL no DNSPP prende serveja lata rua no Sagres botir rua no la autoriza bainaka ne’e atu halo vizita ba Parlamentu Nasionál.

Inspetór Alexandrino dehan, serbisu prende serveja ne’e la’ós foin maka akontese, maibé parte CSP no DNSPP prende beibeik ona ema lori sasán kro’at sira hanesan, tudik no besi kanu ne’ebé tau iha posta laran.

“Ami prende beibeik ona ema lori sasán kro’at tudik modo, besi kanu tau iha pasta laran lori mai Parlamentu Nasionál,”  Alexandrino hatete.

Nia afirma katak, hanesan membru polisia sira hala’o serbisu hodi garantia serbisu Parlamentu Nasionál bele la’o ho di’ak liu-liu asegura seguransa nasionál.

Tuir regra normál kualkér vizitante atu ba Parlamentu Nasionál tenke aprezenta-an ba seguransa Parlamentu Nasionál hanesan lori kartaun identidade, rejista naran no hato’o asuntu vizita nian. Tanba Polisia halo serbisu atu seguransa Órgaun Estadu hotu-hotu.

Hafoin prende bainaka ne’e, parte CSP kontaktu kedas ekipa Investigasaun Polisia Munisípiu Dili hodi tula vizitante ne’e ba Komandu Dili hodi kontinua halo investigasaun kle’an.

Tuir informasaun ne’ebé Ajénsia Tatoli rekolla parte vizitante BSM deklara nia koopera ho parte seguransa, tanba nia parte la ho intensaun aat atu lori fali serveja tama fali ba resintu Parlamentu Nasionál. Tanba ne’e, bainhira halo vizita ba nia aprezenta-an ona ba seguransa hodi hato’o asuntu objetivu vizita ba Parlamentu Nasionál.

“Ha’u la iha intensaun aat atu lori fali serveja tama ba Parlamentu Nasionál, tanba serveja ne’e família fó ha’u lori ba uma mak ha’u haluha atu hasai,” hateten vizitante ne’e.

Vizitante ne’e mós rejista iha livru seguransa nian deklara, vizita ba Parlamentu Nasionál atu hasoru ekipa Komisaun C trata Asuntu Finansas Públiku hodi asiste debate programa ruma ne’ebé halo hela Parlamentu Nasionál.

Parte seguransa halo nafatin koordenasaun hametin vijilánsia seguransa kontrola kualkér vizitante hotu-hotu ba Parlamentu Nasionál tenke uza ropa ho dixiplina inklui proibidu lori sasán kro’at sira.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here