Prezidente Autoridade Munisípiu Manufahi, Arantes Isaac Sarmento. Imajen/Egas Cristovão

MANUFAHI,  28 outubru 2019 (TATOLI)–Administradór Munisipál Manufahi, Arantes Isaac Sarmento, husu Governu Sentrál atu entrega lalais podér desentralizasaun administrativa ba munisípiu sira.

“Planu Governu atu implementa polítika desentralizasaun administrativa iha munisípiu, ami Munisípiu Manufahi aseita no husu fó lalais ona,” tenik nia ba Agência TATOLI, iha nia kna’ar fatin, edifísiu Administrasaun Munisipál Manufahi, Suku Holarua, Postu Administrativu Same, Munisípiu Manufahi, ohin.

Nia dehan, objetivu hosi polítika desentralizasaun fó podér ba autoridade munisipál atu aselera planu no programa munisípiu nian.

Lee mós: http://PR veta lei poder lokal

Arantes husu Governu Sentrál labele fó de’it termu administrativamente de’it, maibé tenke mós fó podér, atu buat hotu-hotu sentraliza iha administradór munisípiu, la’ós iha filafali Governu Sentrál nia liman.

Maibé, tuir nia, la signifika katak tenke hasai kompeténsia Governu Sentrál nia podér hotu, maibé husu Governu Sentrál atu akompaña no observa, katak kuandu Administradór Munisípiu halo di’ak, extende nia mandatu maibé rezultadu serbisu ladi’ak tenke troka ho ema seluk.

“Ami husu ba Governu Sentrál lalika preokupa ho entermu kapasidade Manufahi oan. Signifika, bainhira kapasidade Manufahi oan seidauk másimu, parte ezekutór sira iha kompeténsia tomak atu altera no extende,” Arantes sujere.

Hatán kona-ba rekursu umanu, nia parte mós rekoñese seidauk másimu, maibe la hamate espíritu intelektuál Manufahi oan sira.

Arantes mós esplika katak oras ne’e daudaun Planu Estratéjiku Dezenvolvimentu Munisipál iha hotu ona no hein atu implementa de’it bainhira aplika polítika desentralizasaun.

“Ami hatene didi’ak povu nia nesesidade bázika hanesan bee-moos, eletrisidade, estrada, hadi’a merkadu sira hodi populasaun kontinua buka moris,” nia salienta.

Tanba ne’e, nia informa, Munisípiu Manufahi hakarak kompete ho munisípiu seluk hodi hatudu katak munisípiu refere halo jestaun administrativa di’ak.

Nia haktuir, polítika sentralizasaun ne’ebé oras ne’e Governu Sentrál adota, implika ba administradór munisípiu sira-nia serbisu tanba limita kompeténsia atu dezenvolve munisípiu.

Tuir planu, iha tinan ida-ne’e, Ministériu Administrasaun Estatal sei aprezenta hikas Proposta Lei Desentralizasaun Administrativa no Podér Lokál ba Parlamentu Nasionál atu diskute no aprova.

Antes ne’e, Prezidente Repúblika veta lei refere tanba konsidera seidauk nesesáriu atu implementa desentralizasaun administrativa iha munisípiu sira.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here