Assesór Sosiu Kultura MRLAP, Josh Trindade. Imajen/Nelson de Sousa

MANATUTO, 26 outubru 2019 (TATOLI)-Durante Konsultasaun Públiku ba Lei Kostumeiru no Justisa Tradisionál ho étniku oioin, lia na’in no autoridade lokál sira iha munisípiu lubuk ida fó lisaun ba  Ministériu Reforma Lejizlativa no Asuntu Parlamentár (MRLAP) katak, tradisaun tesi lia ho nia aplikasaun sansaun diferente entre étniku ida ho étniku seluk iha Timor-Leste.

Notísia Relevante :Governu Prioridade Hametin Justisa Tradisionál

Durante ne’e ekipa MRLAP hala’o ona konsulta públiku kona-ba Lei Kostumeiru ho Justisa Tradisionál ho étniku Mambae iha Ermera, Tokodede iha Liquiça, Kemak ho Bunak  iha Bobonaro, étniku Tetum Terik iha Covalima no étniku seluk tan iha Ainaro ho Galolen iha Manatuto.

Hosi étniku sira ne’e nia maneira rezolve disputa sosiál iha suku no aldeia laran atu hanesan, maibé diferensa iha aplikasaun sansaun.

“Ami identifika prosesu tesi lia ka justisa tradisionál ninia similaridade mak barak  hanesan hosi lian  no étniku,” hateten asesór Sósiu Asuntu Kultura MRLAP,  Josh Trindade ba ajénsia TATOLI iha Manatuto bainhira halo hela konsultasaun públiku ba Lei Kostumeiru ho Justisa Tradisionál ba autoridade ho étniku sira Galolen, kinta (24/10/2019).

Asesór Sósiu Kultura hosi MRLAP ne’e fó ezemplu hosi postu administrativu ida ba postu seluk kuandu komunidade halo sala tuir regra tradisionais ne’ebé aplika sansaun la hanesan; balun todan no balun kaman.

Asesór Josh Trindade nia haree katak sentidu hosi aplikasaun justisa tradisionál (tara bandu) la’ós obrigasaun autoridade nian, maibé konsiénsia komún hosi étniku sira atu asegura pás no armonia iha sira nia sosiedade laran.

Nia dehan, durante ne’e estadu seidauk tau atensaun ba justisa tradisionál ne’ebé la’o nanis ona hosi tempu bei-ala sira hodi fó kontribuisaun iha sosiedade nia leet atu prevene konflitu no hala’o mediasaun rezolve kazu ki’ik sira ne’ebé akontese.

Ekipa Ministériu Reforma Lejizlativa no Asuntu Parlamentár (MRLAP) semana oin kontinua realiza konsultasaun hanesan mós iha Munisipiu Baucau kobre lian Makasae, Uai-ma, Kairui, Midiki no Munisipiu Viqueque, Lautem, Rejiaun Administrativu Espesiál Oe-Cusse Ambeno (RAEOA) ho Atauro, Munisípiu Dili.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here