Kondisaun Estrada liga munisípiu ba postu sempre at hanesan mós estrada hosi ba Bee Marobo, Bobonaro. Imajen/Antonio Goncalves

MANATUTO, 25 outubru 2019 (TATOLI)-Veteranu ho autoridade lokál Postu Administrativu Laclubar, Munisípiu Manatuto, preokupa  ho kondisaun estrada aat ne’ebé liga hosi kruzamentu Postu Administrativu Soibada ba Postu Administrativu Laklubar ho distánsia kilo-metru 10-resin.

Prezidente Veteranu Postu Administrativu Laclubar, António Campos Soares, triste ho kondisaun estrada refere tanba sempre difikulta movimentu transporte karreta ho motor iha tempu udan.

Nia  mós observa alende difikulta movimentu transporte públika, difikulta mós povu agrikultór sira atu lori sira nia produtu ba fa’an iha merkadu munisípiu no nasionál.

“Ami preokupa ho estrada ne’e, tanba  estrada hosi Manatuto Vila ba to’o Natarbora, Soibada di’ak hotu ona, maibé ami nia Laclubar seidauk hadi’a,” informa António Campos Soares, ba Ajénsia TATOLI iha Laclubar, kuarta (23/10/2019).

Hatán ba preokupasaun ne’e, Administradór Postu Administrativu Laclubar,  Natalino Martins Carvalho, hatete, nia parte relata ona problema ne’e ba Governu sentrál no Munisípiu hodi fó atensaun.

Tuir nia, antes ne’e kompañia balun halo ona estudu no peskiza ba kondisaun estrada ne’ebá, maibé to’o agora seidauk iha rezultadu estudu ba reabilitasaun.

Iha biban seluk, Xefe  Suku Orlalan Postu Administrativu Laclubar, Carlos Jose Alves, espera Governu da-ualu sei rezolve preokupasaun ne’e hodi reabilita ona estrada refere.

Postu Administrativu Laclubar  ho nia área luan 391,32 kilo-metru kuadradu, iha suku neen, suku Mane Lima, Batara, Orlalan, Funar, Fatumakerek no Sana Nain, iha  Aldeia 29 ho totál populasaun 54.032 maioria moris ho vida agrikultura.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here