Reprezentante Unicef iha Timor Leste, Valérie Taton. Imajen/Egas Cristovão

DILI, 25 outubru 2019 (TATOLI)-Reprezentante UNICEF iha Timor-Leste, Valerie Taton hateten, iha ámbitu lansamentu deslokasaun estudante estajiáriu na´in neen husi Departamentu Komunikasaun Sosiál (DKS), Universidade Nasionál Timor Lorosa´e (UNTL) katak sertidaun moris RDTL (Repúblika Demokrátika Timor-Leste), nu’udar identidade legál ba labarik ida.

“Ne’e surat-tahan ida ho folin boot. Sira mós simu direitu ida katak Governu asina ona direitu ida ne’ebé sei fó ba kada labarik,” konsidera reprezentante UNICEF (United Nation International Children Fund), Valerie Taton, perante akadémiku UNTL sira, iha Kampus Fakuldade Siénsia Sosiál (FCS), Caicoli-Dili, sesta ne´e.

“Ho direitu ne’e, sei hetan mós direitu sira seluk. Ita-boot hetan rekoñesimentu ofisiál husi governu nu’udar sidadaun Timor-Leste,” friza reprezentante Valerie Taton.

Nia akresenta, bele justifika idade liuhusi sertidaun ne´e, importante liu bainhira sei labarik. “Uainhira labarik ida ema envolve iha tráfiku umanu ka sai vítima ba abuzu ida, labarik ne’e bele simu protesaun espesíal husi Governu. Labarik ne’e mós bele uza dokumentu ne’e hodi trata nia passaporte no loke nia konta bankaria,” dehan Valerie Taton.

Nia esplika, sertidaun moris ne’e importante ba labarik, fóin sa’e no adultu ida. Konvensaun direitu labarik, ne’e mak adapta ona tinan tolu-liu ba, rekoñese direitu husi labarik sira, direitu ida ne’ebé konsagra iha artigu hitu mak, direitu rejistu imediamente hafoin moris no direitu ba naran ida no nasionalidade ida.

“Rejistu moris ne’e permanente, dokumentus legál no ofisiál husi labarik ida nia ezisténsia. Ne’e fundamentál ba labarik ida atu goza nia direitu hotu”.

Reprezentante UNICEF, Valerie Taton esplika tan katak labarik sira ne’ebé mak seida’uk rejistu, la eziste ofisilmente tanba governu ho nia parseiru sira la-hatene sira; ne’ebé kria difikuldade atu halo planu dezenvolvimentu ka fó asisténsia ruma ba sira.

“Agradese SEKOMS no UNTL tanba lidera ona inisiativa ne’e no ajuda atu promove rejistu moris iha Timor-Leste. Ita ohin loron, ho apoiu husi Governu Japaun mós simbolikamente entrega ekipamentu balun atu ajuda rádiu komunidade hodi dezenvolve mensajen no programa radiu kona-ba rejistu moris,” konklui Valerie Taton.

Notísia relevante:Estudante DKS UNTL Neen Promove Programa Rejistu Moris Iha SRK

Jornalista: Nelia Fernandes

Editór     : Rafy Belo

HAKEREK NO HATÁN

Please enter your comment!
Please enter your name here