Diretór Nasionál Aprovizionamentu MOP, Quintiliano Afonso Belo. Imajen/ Tatoli Florencio Miranda Ximenes.

DILI, 25 outubru 2019 (TATOLI) – Diretór Nasionál Aprovizionamentu, Quintiliano Afonso Belo, informa liuhosi Orsamentu Jerál Estadu tinan ne’e (2019), Ministériu Obra Públika (MOP) iha Diresaun Nasionál Aprovizionamentu konsege loke konkursu públiku ba projetu hamutuk 217.

Konkursu públiku 217 ne’e kompostu husi projetu Request for Quotations (RFQ) hamutuk 78, National Competitive Bidding (NCB) 95, International Competitive Bidding (ICB) 8, Fixed Budget Selection (FBS-study) hamutuk 21 no Restrict Tendering Procedure (RTP) hamutuk 8 ho sira seluk ne’ebé sei iha preparasaun dokumentu bidding.

“Projetu balun hahú ona faze konstrusaun fízika mak hanesan estrada rurál ho pakote 48, manutensaun rutina estrada nasionál sira pur volta pakote 24 no ba projetu bee-moos kuaze hamutuk 50-resin ne’ebé sei halo mobilizasaun hahú novembru no inklui projetu ki’ik balun”, Quintiliano Afonso Belo afirma iha knaar fatin Kaikoli, ohin.

Orsamentu ba konkursu ne’e, nia dehan MOP prevee iha bens servisu hamutuk $128,457-resin, iha kapitál menór hamutuk millaun $4,7-resin, iha kapitál dezenvolvimentu iha millaun $15-resin inklui millaun $1 ba transferénsia públika.

Diretór Nasionál Aprovizionamentu ne’e adianta konkursu estudu viabilidade no Detailed Engineering Design (DED) ne’e hamutuk 22 kompostu husi estrada nasionál pakote 12 no ponte pakote 2 ho kada pakote ponte 5, inklui mós estudu husi planu urbanu nian hanesan estudu ba konstrusaun Ospitál Lahane, Ospitál Nasionál Guido Valadares, revitalizasaun Aitarak-Laran no polu dezenvolvimentu Baukau ho Batugadé.

Orsamentu ne’ebé MOP prevee ba estudu viabilidade no dezeñu detallada iha tinan ne’e hamutuk millaun $12, inklui estudu planu mestre ba bee-moos no sanitasaun iha kapitál munisípiu 6 hanesan Aileu, Ainaru, Bobonaru, Kovalima, Ermera no Likisá.

“Daudaun estudu hirak ne’e, tama ona iha faze evaluasaun no ami espera katak, iha novembru nia laran ami bele fó sai ona kompañia manán-na’in ne’ebé atu hala’o estudu hirak ne’e tuir kalendáriu”.

Quintiliano Afonso Belo rekoñese mós katak prosesu aprovizionamentu la’o tarde uitoan hodi fó impaktu ba ezekusaun orsamentu ministériu nian. Maibé MOP esforzu nafatin atu nunee, antes kaléndariu orsamentu taka, kompañia sira bele hetan ona kontratu hodi ezekuta obra iha terrenu no servisu ho responsabilidade tuir kontratu.

Nia salienta MOP mós halo ona kontratu ho empreza husi konkursu públiku ne’e kuaze 87-resin inklui kontratu sira ba kapitál menór nian ne’ebé tama ona faze pagamentu.

Entretantu tuir dadus ezekusaun ne’ebé Tatoli asesu Iha portál transparénsia, ezekusaun orsamentu MOP nian atinje ona porsentu 66.2% ho orsamentu Orijin $154,839,377.00, Kompromisu sira hamutuk $37,741,162.97, Obrigasaun sira $11,610,519.89, Atuál $90,896,496.93, Saldu hamutuk $14,591,197.21.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here