Prezidente Repúblika, Francisco Guterres Lú Olo. Imajen Tatoli/ António Gonçalves

DILI, 25 outubru 2019 (TATOLI)–Prezidente Repúblika (PR), Francisco Guterres Lú Olo, iha 22 outubru 2019, aprova lista foun Xefe Misaun Diplomátika na’in-14 ne’ebé nomea hosi Governu.

Komunikadu ne’ebé TATOLI asesu hosi Mídia Prezidénsia Repúblika, ohin, hateten Prezidente Repúblika simu lista foun hosi Primeiru-Ministru iha 21 outubru.

Iha komunikadu ne’e esplika, Governu liuhusi Konsellu Ministru nomea Xefe Misaun hamutuk 14 ba nasaun sira hanesan Austrália, Reinu Unidu no Irlanda Norte, Suíça, Moçambique, Repúblika Portugeza, reprezentante permanente RDTL iha Sekretariadu Ezekutivu Países de Língua Portuguesa, República de Cabo Verde, Singapura, Japaun, Cambodia, Xina, Tailándia, Vatikanu no Laos.

Iha komunikadu ne’e mós sita katak, molok ne’e, iha fulan-agostu 2019, Prezidente Repúblika fó ona pose ba Embaixadór Repúblika Demokrátiku Timor-Leste ba Repúblika Federativa Brazíl, Olímpio Maria Alves Gomes Miranda Branco, Embaixadór Isílio António de Fátima Coelho da Silva ba Estadu Unidu Amérika no Embaixadór Lisualdo Menezes Coimbra Gaspar ba Nova Zelándia.

Hafoin aprovasaun, Prezidente Repúblika sei devolve proposta ne’e ba Ministru Negósiu Estranjeiru no Kooperasaun solisita Agrémen ka aprovasaun ba nasaun ne’ebé embaixadór sei hala’o nia misaun.

Bainhira nasaun reseitór aprova proposta ne’e, sei komunika ba Ministru Negósiu Estranjeiru no Kooperasaun Timor-Leste nian, atu Ministru Negósiu Estranjeiru no Kooperasaun informa proposta aprovadu ba Prezidente Repúblika.

Hafoin simu proposta aprovadu hosi Ministru Negósiu Estranjeiru, Prezidente sei marka loron no oras tomada pose ba embaixadór aprovadu no informa fali ba Ministru Negósiu Estranjeiru no Kooperasaun.

Liuhusi Dekretu Prezidente Repúblika, Xefe Estadu sei fó pose ba embaixadór sira. Hafoin ne’e, Ministru Negósiu Estranjeiru no Kooperasaun sei notifika nasaun resetór kona-ba embaixadór ne’ebé hala’o nia kna’ar.

Bainhira Ministru Negósiu Estranjeiru hosi nasaun resetór marka loron ba serimónia aprezentasaun kredensiál, embaixadór sei aprezenta ninia karta kredensiál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here