Osan Dolar Amerika.

DILI, 24 outubru 2019 (TATOLI) – Ministériu Públiku (MP), ohin,  liuhosi alegasaun final akuza arguido (manipuladór) na’in tolu prizaun tinan hitu efetivu tanba MP konsidera “manipuladór” na’in tolu ‘futu lia’ hodi manipula família benefisiáriu nia osan martires ho valor $24.052,45.

Arguido nain tolu ne’ebé livremente manipula osan martires balun nian ho inisiál DM, DS ho JS. Nune’e, MP husu ba Tribunal atu aplika pena efetiva tinan hitu kadeia atu arguido sira bele la bele halo tan iha futuru.

“Ministériu Públiku laiha duvida ba prosesu ne’e, tanba hosi inísiu nota arguido sira konfesa parsiál ba hahalok sira ne’e, sira rekoñese katak halo duni, tanba ne’e ami nia parte konklui liuhosi sirkunstánsia ne’ebé iha husu atu tribunal aplika kadeia tinan hitu efetivamente iha prizaun,” alegasaun final MP nian.

MP iha razaun fundamentu aprezenta alegasaun ne’e bazeia ba krime ne’ebé imputa ba arguido sira hanesan, krime borla agravadu iha artigu 267, abuzu konfiansa agravadu artigu 257, korrupsaun ativa artigu 294, falsifikasaun dokumentu artigu 303, no krime pekulatu iha artigu 292 hosi lei kódigu penal.

Arguido sira falsifika dokumentu hosi martires Pedro hanesan lezada Mauzino nia aman. Dokumentu sira ne’e arguido sira trata iha sentru Liquiça no sira selu testemuña ida hetan $90.00.

Hafoin iha tinan 2018 martires nia osan sai arguido sira ba foti iha Banku BNU ho montante $24.052,45 no kada fulan arguido sira simu $270.00. Osan ne’ebé foti, arguido nain tolu fahe ba malu, no la hatete ba família martires katak osan sira mak simu.

Rona tiha alegasaun hosi Ministériu Públiku, Juis prezide, Maria Modesta, Ivan Antonino ho Edite Palmira, adia hikas prosesu julgamentu ba loron 22 Novembru 2019, tuku 11:00 Otl, hodi rona pedidu alegasaun defeza nian.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here