Ministru Defeza no Ministru Interior Interinu, Filomeno da Paixão de Jesus, kaer liman ho Adidu Defeza Portugál foun ba Timor-Leste, Koronél Pereira Lopes . Imajen/MD

DILI, 25 outubru 2019 (TATOLI)- Embaixadór Portugál mai Timor-Leste, João Pedro Machado Vieira, kinta (24/10/2019), aprezenta Adidu Defeza Portugál nian foun mai Timor-Leste, Koronél Pereira Lopes hodi  troka mandatu Adidu Defeza Portugál sesante, Koronél Delfim das Dores ne’ebé remata ona nia misaun iha Timor-Leste.

Notísia Relevante : Adidu Defeza Portugál Despede Majór Jenerál Lere

Embaixadór Portugál, João Pedro Machado Vieira, ofisiálmente lori Koronél Pereira Lopes akompaña hosi Koronél Delfin das Dorres  hasoru malu ho Ministru Defeza no Ministru Interiór Interinu, Filomeno da Paixão de Jesus.

“Adidu Defeza Portugál Koronél Delfin Dores tinan tolu halo serbisu ho ita. Nia remata ona nia misaun, tanba ne’e aprezenta adidu foun Koronél Pereira Lopes mai para atu ita kontinua koopera serbisu ho Portugál,” dehan Ministru Defeza Filomeno ba jornalista iha Ministériu Defeza, Fatuhada, Dili.

Ministru Filomeno apresia, tanba Embaixadór  Portugál, João Pedro Machado Vieira, kontinua lori estadu Portugál hodi koopera iha Ministériu Defeza no Komandu F-FDTL reforsa área rekursu umanu.

“Portugál agora ajuda iha barak iha área rekursu umanu ba sarjentu too soldadu hodi ba forma iha akademia militár Portugés no sarjentu sira ba formasaun iha Marina nian iha Portugál. Nune’e mós ofisial sira ba iha kursu kapitaun no kursu jenerál iha Portugál,”  Ministru Filomeno Paixão hateten.

Portugál mós hakarak simu membru F-FDTL ba tuir formasaun ho militár Portugál hodi hala’o misaun manutensaun pás nian iha Organizasaun Nasoins Unidas (ONU).

Iha oportunidade ne’e, Adidu Defeza Portugál mai Timor-Leste Koronél Delfim Dorres, halo mós despedida ho Ministru Defeza Filomeno  hodi hato’o nia mensajen agradesimentu durante koopera ho nia hala’o servisu iha Timor-Leste.

Fatin hanesan, Embaixadór Portugál, João Pedro Machado Vieira, husu atu adidu Defeza foun Koronél Pereira Lopes kontinua kria kooperasaun hodi ajuda dezenvolvimentu Governu no Komandu F-FDTL.

Antes ne’e’, Xefe Estadu Maiór Jenerál FALINTIL-FDTL, Majór Jenerál Lere Anan Timur  hala’o mós enkontru ho Adidu Defeza Portugál Delfim das Dores hodi hato’o agradesimentu.

Lere rasik apresia durante tinan tolu, Koronél Delfim halo serbisu ajuda Komandu no instituisaun F-FDTL.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here