Membru Bankada CNRT, Adérito Hugo da Costa. Imajen Tatoli/Egas Cristóvão

DILI, 25 outubru 2019 (TATOLI)— Komisaun B trata asuntu Defeza, Seguransa no Ministériu Negósiu Estranjeiru no Kooperasaun lideradu Adérito Hugo da Costa, lamenta ba Komandu Polísia Nasionál Timor-Leste, tanba ezekusaun ba akizisaun sosa drone no fornesimentu tanke bee-moos ba postu sira iha fronteira tarde liu.

Hugo hato’o nia lamentasaun ne’e bainhira Komisaun B hala’o audiénsia ho Ministériu Interiór kompostu hosi ekipa Sekretaria Estadu Protesaun Sivíl, Polísia Nasionál Timor-Leste (PNTL) no Migrasaun, iha Parlamentu Nasionál, ohin.

“Ami tau osan atu hola drone para halo vizilánsia iha ita-nia fronteira to’o agora seidauk finaliza. Ami tau osan para hola tanke bee nian hodi fornese bee ba postu sira iha fronteira, ne’e ezekusaun tarde liu. Agora atu tama ona fulan-novembru, sasán sira ne’e seidauk tama. Situasuan ne’e ami observa lamentável tebes”, nia lamenta.

Tuir Komisaun B katak parte seguransa uza hela Rejime Aprovizionamentu Espesiál maibé ezekusaun akizisaun tarde tebes.

Nia hein katak ho Rejime Espesiál ne’ebé iha bele kompra ekipamentu ba PNTL no Migrasaun nian bele ezekuta restu orsamentu ne’e.

Iha audiénsia dahuluk ne’e, marka prezensa hosi Ministru Interiór Interinu, Filomeno da Paixão de Jesus no Sekretáriu Estadu Protesaun Sivíl, Alexandrino de Araújo.

Prezidente Komisaun B, Adérito Hugo da Costa, hateten hahú hosi dadeer to’o intervalu foka liubá ezekusaun orsamentu 2019 nian.

Tuir portál orsamentál hosi Ministériu Interiór ninian, orsamentu orijen $51,284,986.00, kompromisu sira $2,523,319.90, obrigasaun sira $5,064,176.45, atuál $33,460,461.72.

Purtantu, ezekusaun atuál hosi Ministériu Interiór to’o loron sesta meudia atinje ona 75.1%.

Hugo esplika, parte Ministériu Interiór nian osan restu hela millaun $10 resin.

Enkuantu, Komandante Jerál PNTL, Komisáriu Faustino da Costa sei fó resposta kona-ba montante orsamentu ne’ebé atu kompra drone no orsamentu kompra bee-moos ba postu polísia fronteira.

Nune’e mós, sei relata razaun komandu PNTL nian kona-ba ezekusaun akizisaun ne’ebé tarde ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here