Prezidente Parlamentu Nasionál, Arão Noé de Jesus da Costa Amaral. Imajen Tatoli/Cipriano Colo

DILI, 25 outubru 2019 (TATOLI)–Governu tenke sériu rezolve vítima hosi inséndiu liuliu uma ahi-haan hotu.

“Ha’u hanoin ida-ne’e grave tebes no ha’u sujere ba Governu tenke halo ona polítika ida ho sériu nune’e atende vítima sira, tanba vítima balun uma ahi-haan hotu, satán agora udan besik ona. Se udan ona entaun sira ne’ebé uma ahi-haan laiha fatin atu hela”, Prezidente Parlamentu Nasionál, Arão Noé de Jesus da Costa Amaral, ba jornalista sira, iha Parlamentu Nasionál, sesta ne’e.

Nia akresenta, bainhira ahi-haan uma ka rua, provizoriamente ba fali família seluk nia uma, maibé ahi-haan to’o atus-rua no atus-tolu ne’e sai preokupasaun boot.

Inséndiu ne’ebé akontese iha loron 2 outubru 2019, dahuluk hahú hosi Ermera, Liquiçá, Bobonaro no Aileu.

“Relatóriu hosi Komisaun F nian katak uma besik 600 mak hetan estragu. Seidauk inklui akontesimentu iha Baucau no parte Ainaro nian. Situasaun grave tebes ona. Tan ne’e, presiza tau atensaun sériu”, dehan Arão Noé.

Nia sujere ba Governu tenke apoia faze dahuluk mak hahaan, daruak tenke apoia ona materiál konstrusaun hodi arranja kalén fahe ba vítima sira, nune’e ida-idak bele harii fali uma.

“Ne’e bele tulun komunidade katak bainhira udan monu-rai, sira iha fatin ona hodi hamahon-aan. Ha’u hanoin katak ne’e mak solusaun ida importante”, tenik Arão.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here