Diretor Jerál STAE, Edgar Sequeira Martins. Imajen/Osório Marques.

DILI, 25 outubru 2019 (TATOLI)-STAE (Sekretária Tékniku Administrasaun Estatál) CNE (Komisaun Nasionál Eleisaun-sigla portugés) koopera ho PNUD (Programa Nasaun Unida ba Dezenvolvimentu-sigla inglés) organiza formasaun kona-ba Multimedia no Komunikasaun durante loron ha’at, hahú 22 to´o 25 outubru, ba funsionáriu STAE no CNE inklui mós instituisaun parseria balun, hamutuk na´in 25.

Diretór Jerál STAE, Edgar Siqueira Martins hateten, formasaun ida ne’e hanesan projetu apoiu ida hosi UNDP ba STAE nune’e mós CNE ba preparasaun serbisu iha eleisaun nian.

“STAE ho CNE koopera ho UNDP, liuhosi projetu apoiu hosi UNDP ba STAE no CNE, hodi ita organiza iha ita-nia kalendáriu formasaun ida iha área multimedia, entaun  ita envolve partisipante funsionáriu sira hosi STAE, CNE no parseiru sira hosi organizasaun sira ne’ebé maka ita bolu defisiensia matan, KAUKUS no mós parseiru seluk tan ne’ebé nomeia sira-nia pesoál mai tuir formasaun iha área multimedia,” dehan diretór iha Otel The Ramelau.

Iha formasaun ne’e, Diretór Edgar relata formandu sira aprende kona-ba oinsá atu opera kamera no utiliza hodi hetan imajen no video ne’ebé liuliu hosi eleisaun nian ne’ebé ho  kualidade hodi transmite ba iha audiénsia.

Formadór mai hosi PNUD hodi fó formasaun ba partisipante funsionáriu sira oinsá atu utiliza ekipamentu kamera, oinsá halo  jestaun ba kamera no jere ba fotografia ka dadus sira ne’ebé maka iha ona nune’e mós oinsá atu bele kapta figura ne’ebé bele prodús no hato´o mensajen ba audiénsia sira.  “Ida ne’e  importánsia hosi papél media nian tanba ne’e ita fasilita formasaun ne’e atu sira mós bele aplika iha serbisu fatin ho di’ak,” diretór ne’e haktuir.

Diretór ne’e mós Konsidera formasaun ne’e iha tebes benefisiu ba iha partisipante sira. “Benefisiu direita maka sira iha liután abilidade atu opera ekipamentu multimedia ne’ebé iha, nomeadamente kámera fotográfia no vídeo nian, iha ámbitu eleisaun nian, oinsá sira bele organiza didi´ak video no fotografia di’ak hodi transmite ba audiensia sira”.

Diretór ne’e realsa liután katak agora ne’e sempre mosu  dezafiu no komplesidade  tanba ne’e tenke iha nafatin formasaun ba funsionáriu sira hodi bele iha koñesimentu kona-ba dezenvolvimentu teknolojia.

Formasaun ba tinan ida ne’e STAE serbisu hamutuk ho PNUD. Nune’e, agora ita idenfika no dezenvolve hela ho UNDP iha tinan oin sei iha nafatin formasaun iha área ne’ebé hanesan maibé ho modulu ne’ebé maka diferente, liga liu ho prestasaun serbisu iha eleisaun nian.

Antes ne’e mós iha ona formasaun ba funsionáriu sira,  iha eleisaun sira, ita forma nafatin funsionáriu sira tanba ita hatene dezafiu no kompleksidade sempre mosu entaun ita tenke kapasita nafatin funsionariu sira hodi  akompaña la´o ho dezenvolvimentu teknolojia ne’ebé maka la´o maka´as tebes.

Enkuantu, Formandu Cejar Agusto Conceição Carvalho nu´udar funsionáriu hosi Organizasaun Hadomi Timoroan kontente tanba bele aprende liután kona-ba matéria multimedia no kommunikasaun hodi bele implementa iha serbisu fatin.

“Matéria loron ha’at ne’e buat ida ne’ebé ami hakarak atu aplika liu tanba iha ami nia serbisu fatin dalaruma halo publikasaun ba atividade sira hotu maibé  durante ne’e ami halo ladun tuir estrutura tanba ne’e ami sente kontente mai aprende no ami sei lori ba aplika iha serbisu fatin hodi fahe ba kolega sira ne’ebé maka hakarak atu aprende,” Cesar hateten.

Nia mós hateten, formasaun durante loron haat ne’e maske la sufisiente tanba tempu limitadu tebes maibé agradese tanba bele aprende uitoan.

“Matéria ami simu loron haat maka loron primeiru  oinsá atu aprende ba foto ka tékniku báziku, loron segundu oinsá halo video no editing, no loron terseiru ami hetan matéria kona-ba oinsá atu hakerek notísia ho di’ak no loron ikus liu maka ami simu matéria design graphic. Ita atu dehan sufisiente lae tanba matéria ida loron ida tanba ne’e ita-nia kakutak atu kapta ladun no tempu limitadu maibé mais ou menos bele aprende oituan,” nia konsidera.

Jornalista: Nelia Borges

Editór     : Rafy Belo

HAKEREK NO HATÁN

Please enter your comment!
Please enter your name here