Embaixadora EUA iha Timor-Leste, Kathleen Fitzpatrick. Imajen António Goncalves

DILI, 25 outubru 2019 (TATOLI)- Estadus Unidus Amérika (EUA) observa durante independénsia too agora, Estadu Timor-Leste hatudu ezemplár ba mundu hodi nakloke-an kria kooperasaun di’ak no nasaun viziñu sira no hametin liña kooperasaun ho nasaun Indo-Pasífiku sira.

Ezemplu boot no pozitivu liu ne’ebé EUA haree bele sai modelu ba mundu tomak. liuliu Timor-Leste foin ukun aan, maibé buka rezolve problema disputa rai no fronteira tasi  ho Austrália no Indonézia ho tempu ne’ebé lalais liu kompara ho nasaun sira seluk ne’ebé ukun-an tinan barak ona.

“Timor-Leste maka ezemplu brillante iha rejiaun Indo-Pasífiku, tanba uza ona mekanizmu hodi rezolve problema disputa rai, tasi ho dame entre Timor-Leste no Austrália no Timor-Leste no Indonézia bazeia ba regra internasionál. Ha’u nia parabéns,” afirma Embaixadóra EUA mai Timor-Leste, Kathleen Fitzpatrick, bainhira sai oradór iha konferénsia internasionál ne’ebé organiza hosi Institutu Defeza Nasionál Timor-Leste (IDN-TL), kinta (24/10/2019), ho tema “FREE AND OPEN INDO-PASIFIC STRATEGY” hodi ko’alia kona-ba estratéjia EUA ba iha nasaun Indo-Pasífiku nian.

EUA haree, Timor-Leste hatudu demokrasia livre tebes iha vizaun kona-ba Indo-Pasífiku ida ne’ebé livre no abertu importante tebes atu serbisu hamutuk hodi promove liberdade, pás no seguransa ho prosperidade ba ema hotu- hotu.

Durante ne’e, estratéjiku defeza EUA halo esforsu makas iha Indo-Pasífiku nian atu bele lori nasaun sira iha Sudeste Aziátiku no ASEAN kria kooperasaun ida di’ak.

“Ita hakarak promove pás ho seguransa livre ba ema hotu-hotu no ita halo esforsu atu iha Indo-Pasífiku ne’e nasaun hotu forte no independente rezolve konflitu ho dame no bazeia ba regra internasionál sira. Importante tebes iha parseiru nasaun Indo-Pasífiku sira atu harii serbisu hamutuk,”  afirma Embaixadóra Kathleen Fitzpatrick.

Nia konsidera nasaun sira hosi illa Sudeste Aziátiku no ASEAN mós sai hanesan baze sentrál ba vizaun EUA iha Indo-Pasífiku no Timor-Leste jeografia hola parte iha rai klaran nu’udar nasaun foun hosi Indo-Pasífiku nian hatudu ezemplu di’ak.

Ba oin, EUA hola parte serbisu ho nasaun Indo-Pasífiku sira inklui Timor-Leste kontinua haforsa iha área defeza, dezenvolvimentu edukasaun, agrikultura, juventude, seguransa, justisa servisu ho instituisaun no sosiedade sivíl sira.

Vise Sekretariu Adjuntu Interinu Defeza EUA ba Asia no Sudeste Asiatiku, Chris R. Johnstone. Imajen/Antonio Goncalves

Iha fatin hanesan, Vise Sekretáriu Adjuntu Interinu Defeza Estadus Unidus Amérika (EUA) ba Ázia Meridionál no Sudeste Aziátiku, Chris R. Johnstone dehan, vizaun nasaun Indo-Pasífiku hakarak promove nasaun hotu moris livre no nakloke no respeitu ba soberania no independénsia nasaun sira hotu boot ka ki’ik, buka maneira rezolve problema disputa rai no tasi tuir rezolusaun internasionál, kria komérsiu ekonomia ida livre, justu no resíproku, adezaun ba regra no normál internasionál sira inklui livre navegasaun no sobre vou no  rekoñese sentralidade hosi ASEAN.

Nia husu ba futuru, nasaun sira nasaun Indo-Pasífiku sira bele serbisu hamutuk iha apoiu ba dezastre naturál, serbisu ba seguransa marítima tasi no serbisu protesaun rikusoin iha tasi entre nasaun viziñu hodi hametin dame hodi haforsa ekonomia rai ida-idak nian.

Antes ne’e Negosiadór Prinsipál Fronteira Timor-Leste, Kay Rala Xanana Gusmão, deklara, Timor-Leste orgullu tebes bainhira hakotu problema disputa rai no tasi ho Austrália no Indonézia hodi hametin liután kooperasaun iha área oin-oin.

“Lei internasionál kria husi komunidade sira hodi regula relasaun entre estadu sira kontribui ba rezolusaun disputa internasionál ho maneira ida ne’ebé konstrutivu no pasifika, no garante katak la’ós nasaun forte sira de’it maka sempre manan,” dehan Xanana bainhira hamutuk ho Ministru Koordenadór ba asuntu Polítika Justisa no Defeza Repúblika Indonézia, Wiranto asina nota prinsipál hodi hakotu segmentu fronteira rai no tasi iha Jakarta Indonézia loron (22/07/2019).

Hanoin hanesan, tatoli mós hosi Primeiru-Ministru Taur Matan Ruak katak, Timor-Leste no Austrália ne’ebé rezolve liuhosi tratadu istóriku ida hodi estabelese fronteira marítima permanente. Ida ne’e marka hahú era foun ida iha relasaun di’ak entre nasaun viziñu rua.

“Ne’e momentu ida ne’ebé hatudu ami nia dezeju mútua forte hodi alkansa akordu ida justu no ekuitativu, hafoin prosesu negosiasaun susesu ne’ebé uza primeira vés mekanizmu sira husi konsiliasaun previstu iha konvensaun Nasoins Unidas ba Direitu tasi (UNCLOS,” dehan Taur Matan Ruak, bainhira hamutuk ho Primeiru-Ministru Austrália, Scoot John Marrison, iha ámbitu troka nota diplomátiku iha Palásiu Governu loron 30 agostu 2019.

  “Pedro Klamar Fuik” Apresia

Diretor IDN,Pedro Klamar Fuik.Imajen/Antonio Goncalves

Diretór IDN-TL, Donaciano Costa Gomes “Pedro Klamar Fuik” dehan, konferénsia internasionál ne’e realiza koopera ho EUA hodi hili tema “FREE AND OPEN INDO-PASIFIC STRATEGY” importante hodi rona esperiénsia oradór Vise Sekretáriu Adjuntu Interinu Defeza Estadus Unidus Amérika (EUA) ba Ázia Meridionál no Sudeste Aziátiku Chris  Johnstone.

“Konferénsia ne’e importante tebes ba ita nia rain ne’ebé lokaliza kedas iha pozisaun entre Oseanu Indianu no Oseanu Pasífiku ho Kontinente Sudeste Aziátiku iha Austrália, Timor-Leste ho (Indonézia) importante tebes ba iha sentidu Indo-Pasífiku oinsá halo ita nia estratéjia hodi hametin liután kooperasaun,” hateten Pedro “Klamar Fuik”.

Tuir nia haree, matéria ne’ebé fahe kona-ba estratéjika Indo-Pasífiku ne’e importante, tanba Timor-Leste hanesan nasaun foun, ne’ebé hala’o relasaun diplomasia amigu tebes ho EUA no sai hanesan Timor-Leste nia belun  hanesan nasaun super poténsia iha mundu no ho informasaun sira ne’e bele aumenta kle’an tan partisipante sira nia koñesimentu.

Tuir ajenda iha tinan 2020 ba oin, IDN sei realiza tan konferénsia internasionál daruak ho tema “Timor-Leste Seclo do Mar” ho nia sub tema rua. Ida maka Indo-Pasífiku ka Free And Open Indo-Pacific Strategy no ida seluk maka Forum do Mar CPLP.

IDN- TL harii iha dezembru 2010, bazeia ba dekretu Lei no 12/2010 loron 26 Agostu ho hatuur nia knaar, hanesan órgaun tutela husi membru governu responsavel iha área defeza nian, hala’o nia kompeténsia iha área Estudu, Investigasaun, Ensinu iha matéria defeza nian.

Bazeia ba knaar iha leten IDN kada tinan-tinan sempre organiza konferénsia internasionál no mini konferénsia ho objetiva hodi partilla informasaun ba sosiedade Timorense kona-ba asuntu relevante.

Jornalista : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here