Cristina da Conceição, feto rurál husi Munisípiu Aileu. Imajen TATOLI/Cipriano Colo

DILI, 25 outubru 2019 (TATOLI)–Cristina da Conceição, delegada ba Kongresu Nasionál Feto 2019 hosi Munisípiu Aileu, husu ba autoridade sira ne’ebé iha kompeténsia atu foti desizaun ba destinu nasaun ne’e, presiza tetu didi’ak. 

Delegada feto rurál ne’e husu tanba ikus-ikus ne’e, públiku preokupa ho asuntu eleisaun antesipada ne’ebé antes ne’e fó sai hosi Primeiru-Ministru, Taur Matan Ruak dehan bainhira laiha dalan atu rezolve problema membru governu pendente, bele ba eleisaun antesipada.

“Tuir ami feto rurál nia haree katak ita iha ona esperiénsia kona-ba eleisaun antesipada (EA) dala ida, tan ne’e koko atu haree no analiza katak situasaun saida mak ita-nia nasaun ne’e enfrenta, presiza aprende hosi ne’e. Tetu to’ok katak osan hira mak ita gasta, situasaun saida mak ita enfrenta no ema hira mak sei ba vota”, Cristina hato’o lia hirak ne’e iha Centro Convencões Dili, ohin.

Cristina fiar katak desizaun ne’ebé nai-ulun sira foti, sei iha vantajen di’ak ba rai no povu ida-ne’e, tanba ko’alia kona-ba eleisaun antesipada, ko’alia kona-ba partisipasaun ema hotu nian no kestaun mak ema sei partisipa ka lae.

“Ami feto rurál husu ba nai-ulun sira atu tetu hosi aspetu hotu, nune’e ami povu labele sai vítima, liuliu ami sira iha área rurál ne’ebé dalaruma ami-nia oan sira eskola iha Dili tenke ba fali foho, ne’e presiza tetu”, nia sujere.

Cristina mós fó nia observasaun katak problema polítika ohin loron ne’e simples de’it, ho nia solusaun simples, mak tuur hamutuk, ko’alia ba malu, iha minutu ida nia laran bele rezolve.

Maibé, buat ne’ebé durante ne’e feto rurál haree katak nai-ulun sira nunka tuur hamutuk no bainhira situasaun ne’e kontinua, sei la hetan duni solusaun ba problema.

Nune’e mós, Francelina Amelia, delegada feto rurál hosi Munisípiu Liquiçá hateten nia parte laiha kompeténsia atu fó komentáriu tanba atu deside eleisaun antesipada ka lae, ne’e kompeténsia nai-ulun sira-nian.

“Ami feto rurál nia hakarak mak desizaun hotu ne’ebé nai-ulun sira foti, labele hamosu tan problema tanba ami hakarak mak pás no hakmatek, nune’e ami bele buka no hala’o ami-nia moris ho kontente”, Francelina hateten.

Aleinde ne’e, Higia Xavier Araújo dos Santos, delegada feto rurál hosi Munisípiu Ermera haklaken eleisaun antesipada iha tinan 2018, bele haree ona nia persentajen populasaun hira mak partisipa no osan hira mak gasta.

“Bainhira ita hakarak eleisaun antesipada, ita tenke halo analiza katak ho esperiénsia ne’e populasaun sei hakarak partisipa ka lae iha eleisaun antesipada tuir mai”, nia kestiona.

Entretantu, Timor-Leste hala’o ona eleisaun antesipada Parlamentár iha loron 12 maiu 2018, hodi hili deputadu 65, ne’ebé oras ne’e hakna’ar-aan iha Parlamentu Nasionál (PN).

Totál votante iha eleisaun antesipada 2018, hamutuk 784.286 (%100), taxa partisipasaun 634.156 (%80, 86).

Hosi númeru votante ne’e, mane hamutuk 325.868 (%51,39) no feto hamutuk 308.288 (%48, 61). Ema ne’ebé la tuir eleisaun hamutuk 150.130 (%19, 14).

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here