Ministru Obra Públika, Salvador Eugénio Soares dos Reis Pires, entrega prémiu ba manán-na'in husi empreza Farm Pro. Imajen Tatoli/Natalino dos Santos

DILI, 25 outubru 2019 (TATOLI) – Kompañia nasionál tolu hanesan Acelda, Farm Pro no Kafé Orgánika Atsabe sai manán-na’in ba Prémiu Esportadór TradeInvest 2019 ba iha kategoria tolu diferente.

Acelda, primeiru lugar ba kategoria esportadór exepsionál, Farm Pro manán ba kategoria esportadór potensiál no kompañia Kafé Organika Atsabe vensedora ba kategoria star up business.

Diretór Ezekutivu TradeInvest Timor-Leste, Arcanjo da Silva, hateten ne’e nudar prémiu anuál no atribuisaun prémiu ne’e ba datoluk dezde 2017 ho kategoria rua maka hanesan esportadór exepsionál no esportadór potensiál. Maibé iha tinan ne’e, TradeInvest aumenta tan kategoria ida maka hanaran star up business .

“Objetivu prinsipál ita fó apresiasaun ba iha ita-nian empreza sira ne’ebé ohin loron bele esporta ona sira-nian produtu bá li’ur”, dehan Diretór Ezekutivu TradeInveste ba jornalista sira iha Timor Plaza, ohin.

Prémiu ida ne’e, TradeInvest avalia husi aspetu barak maka hanesan sé maka esporta barak bá li’ur ho kualidade di’ak liu, kompañia ne’e nia atividade benefisia komunidade ka lae, no atividade sira ne’e halo liuhusi vídeo hodi haruka ba ekipa panelista sira hodi deside. Ne’ebé maka husi prémiu ne’e motiva liután empreza rai-laran bele esforsa aan kriativu liután.

Arcanjo da Silva fundamenta katak prosesu ba iha selesaun kompañia ida atu sai manán-na’in ne’e ho rigór tebes tanba halo avaliasaun entre ekipa juri husi TradeInvest, IADE, SERVE, no ajénsia kompetente balun.

Ministru Koordenadór Asuntu Ekonómiku interinu, Fidelis Manuel Leite Magalhães afirma nia parte apresia tebes tanba empreza timoroan balun ho vontade tomak hahú halo ona dezenvolvimentu iha setór agrikultura.

“Hanesan empreza tolu ne’ebé maka manán prémiu husi TradeInvest ba esportasaun tinan ida ne’e, loke ona pasu pozitvu ida ba iha Timor-Leste hodi enkoraja empreza sira atu hahú hakat”, dehan Fidelis.

Nia parte rekoñese Timor-Leste nian valór esportasaun sei défisit, maske nune’e sei buka esforsu hodi tulun empreza rai-laran atu kontinua hakat bá oin tanba Governu iha papél boot hodi kontinua apoia empreza nasional sira atubele halo negósiu nune’e bele tulun Governu diversifika ekonomia nasaun no povu nian.

Nia husu ba setór privadu, liuliu atu serbisu maka’as no hatudu kriatividade, nune’e bele identifika potensialidade Timor-Leste bele esporta, aléinde kafé ne’ebé daudaun ne’e sai produtu Timor-Leste nian.

Na’in ba empreza Kafé Orgánika Atsabe, Maria da Costa, ne’ebé sai vensedora ba prémiu kategoria star up business hatete kontente tanba husi nia esfosu durante ne’e halo prosesamentu kafé, TradeInvest bele hili nia.

Durante ne’e, esporta kafé tonelada ida ba iha Austrália, Nova Zelándia. Ho prémiu ne’e sei motiva hodi esforsa atu kontribui ba dezenvolvimentu setór ekonomia iha Timor-Leste.

Kompañia Acelda, Farm Pro no Kafé Orgánika Atsabe ne’ebé sai manán-na’in ne’e hetan prémiu ho osan montante ba kada vensedór $500,00 husi empreza Jackson Lay.

Trade Invest Hahú Promove Empreza Lokál ba Rai-Li’ur

Diretór TradeInvest Timor-Leste Arcanjo da Silva dehan durante servisu TradeInvest hahú promove empreza lokál ba estranjeiru.

“Ami lori empreza lokál hanesan Acelda bá iha Makau, Hong Kong, Xina, Portugál no Austrália”.

Aléinde Acelda, bainhira TradeInvest halo promosaun bá iha rai-li’ur, lori ona mós empreza Nova Casa Fresca no planu sei lori hotu emprezáriu nasionál hodi halo promosaun nune’e bele hatene lala’ok tékniku negósiu iha rai-li’ur hodi mai aplika fali iha rai-laran.

TradeInvest mós kontinua esforsu halo parseria ho internasionál sira atubele tulun empreza lokál nune’e bele kapasita sira iha área negósiu nian.

Nune’e mós halo ona akordu tékniku lubuk ida ho nasaun barak hanesan órgaun ISED Portugál oinsá halo planu investimentu no halo akordu ho Makau iha área investimentu nian.

“Atu servisu hamutuk para kapasita ita-nian emprezáriu no promove sira no kapasita staff husi TradeInvest nian para halo servisu no atendimentu di’ak liu”, katak.

Kona-ba produtu Timór nian ne’ebé esporta ona, Diretór TradeInveste ne’e hateten kompañia CCT (Kooperativa Kafé Timór) maka halo esportasaun mós ba kafé Timor-Leste nian hanesan Austrália, no Amérika. Nune’e mós kompañia sira ne’ebé manán ona prémiu.

TradeInvest iha obrigasaun boot atu hametin koopersaun ho parseiru liuliu ajénsia sira liuhusi akordu tékniku atu fasilita ajénsia sira kontinua tulun empreza rai-laran ba promosaun produtu.

TradeInvest Selebra Akordu ho MDF

TradeInvest asina akordu tékniku ho Ajénsia Development Market Developmet Facility husi Austrália. Imajen/Natalino Costa.

Iha ámbitu entrega prémiu ba manán-na’in sira, TradeInvest mós selebra akordu ho Market Development Facility (MDF) hodi apoia téknika ba empreza lokál sira oinsá atu buka merkadu ba sira-nian produtu.

“Tanba ne’e maka ami asina akordu ne’e para servisu hamutuk oinsá sira atu buka ba ita-nia emprezáriu sira merkadu ba produtu sira ne’ebé liga ba merkadu internasionál no ba rejionál sira”, dehan Diretór Ezekutivu ne’e.

Arcanjo da Silva salienta MDF durante ne’e apoia direta empreza rai-laran, tanba ne’e maka relevante tenke asina akordu tékniku para asegura halo buat ruma iha konkordánsia ba malu.

“Ho akordu ne’e, ajénsia internasionál Market Development Facility sei fasilita emprezáriu timoroan liuhusi TradeInvest. Enkuantu empreza lokál sira hakarak esporta produtu ita-nian, ajensia ne’e sei ajuda hodi promove produtu ne’e bá merkadu internasionál”, dehan nia.

Diretór Ezekutivu TradeInvest ne’e katak ajénsia MDF husi Austrália ne’e, atu fó apoiu tékniku ba promosaun produtu esportasaun husi Timor-Leste bá Austrália.

Notísia relevante : Ohin, TradeInvest Organiza Premiu Exportasaun 2017

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here