Reprezentante Ajénsia Organizasaun Nasoins Unidas (ONU) sira Timor-Leste introdús programa serbisu jerál ba estudante kursu promosaun ofisial superiór hosi FALINTIL-Forsa Defeza Timor-Leste no Polisia Nasionál Timor-Leste (PNTL) iha Kampaun ONU, Caicoli, Dili, sesta (25/10/2019). Imajen/Eugénio Pereira

DILI, 25 outubru 2019 (TATOLI)- Ajénsia Organizasaun Nasoins Unidas (ONU) iha Timor-Leste koordena ho Institutu Defeza Nasionál Timor-Leste (IDN-TL) introdús programa serbisu jerál ba estudante kursu promosaun ofisial superiór hosi FALINTIL-Forsa Defeza Timor-Leste ho Polisia Nasionál Timor-Leste (PNTL).

Organizasaun sira ne’ebé fahe sira nia programa prioridade ne’ebé hala’o liga ba misaun ONU iha Timor-Leste maka hanesan, UNCHR, UN Women, UNDP,WFP  no IOM ne’ebé kada organizasaun, ohin, fahe tempu minutu 20 hodi halo introdusaun.

Reprezentante ONU nu’udar mós Tenente Koronél Forsa Defeza Nova Zelándia (‎NZDF), Martín Dransfield dehan, programa ajénsia ONU fahe programa serbisu ba ofisial F-FDTL no PNTL ne’e importante hodi hasa’e sira nia koñesimentu liga ba serbisu ONU nian. Nune’e bainhira membru F-FDTL no PNTL hala’o misaun dame ONU nian iha rai li’ur sira bele iha ona esperiénsia sufisiente.

“Ne’e formasaun importante tebes-tebes katak, ofisiál hosi F-FDTL no PNTL atu komprende saida maka ONU hala’o atu ita presiza serbisu hamutuk,” hateten Martín Dransfield iha nia diskursu iha ámbitu serimónia nee  iha Kampaun ONU, Coicoli, Dili.

ONU apresia tebes bainhira koopera IDN-TL ne’ebé fó hela formasaun ba ofisiál militár F-FDTL na’in 14 no PNTL na’in 13 bele aumenta sira nia koñesimentu.

ONU  iha kompromisu kontinua fó apoiu ba F-FDTL no PNTL atu kontinua partisipa kursu kona-ba operasaun ba pás hodi fó kontribuisaun ba dezenvolvimentu Timor-Leste ohin ba futuru.

Oradór organizasaun ONU sira ne’ebé fahe esperiénsia sersisu maka hanesan, Maria Amelia de Araújo hosi UN Women, Andrew Harrington hosi UNDP, Francisco Soares hosi WFP, Luis dos Reis hosi WHO no Wonesai Sithole hosi IOM.

Tenente Koronél  Forsa Defeza Nova Zelándia reprezenta mós Forsa Defeza Austrália (‎NZDF- ADF), Martin, konsidera membru observadór militár F-FDTL ba Organizasaun Nasoins Unidas  (ONU) iha ona kapasidade sufisiente hodi bele hala’o misaun manutensaun ba pás nian iha mundu.

Martin dehan, Forsa Nova Zelándia no Austrália apresia tebes durante ne’e koopera ho Komandu F-FDTL estabelese Sentru Treinamentu Peace Keeping ONU iha Metinaro no fó treinamentu área militár nian para prepara forsa sira atu hala’o misaun iha ONU.

Membru F-FDTL sira tuir ona kursu semana tolu ne’ebé sira fahe ba Membru Observadór Militár Nasoins Unidas   aprende uluk matéria no teoria revizaun ba serbisu militár nian hodi uza ekipamentu modernu hanesan, rádiu komunikasaun no fasilidade militár nian importante sira inklui, fó asisténsia saúde no atende problema ruma kona-ba asidente tráfegu ka insidente seguransa no seluk tan.

Membru forsa sira aprende halo patrullamentu oinsá hala’o reuniaun ho autoridade suku hodi buka akalma situasaun konflitu iha bairru sira ne’ebé risku mosu problema krime no violénsia bele hetan dame.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here