Tasa Tolu husi Jogu Liga Futeból Amadora (LFA) époka 2019, ne’ebé Lalenok United FC hetan tutuir malu. Imajen/Hortençio Sanchez

DILI, 24 outubru 2019 (TATOLI)–Klube promovidu Primeira Divizaun époka 2019, Lalenok United FC, hanesan klube dahuluk ne’ebé marka istória iha futeból Timor-Leste, tanba iha fulan neen nia laran de’it ekipa refere sai Treble Winner ka sai kampiaun dala tolu iha períodu ida.

Lalenok sai kampiaun ba jogu Primeira Divizaun LFA, Tasa 12 Novembru no Super Tasa. Ho kampiaun ida-ne’e, lori Lalenok manán prémiu osan ho montante rihun $86.

Tuir tabela prémiu jogu Primeira Divizaun ne’ebé Tatoli asesu hosi Liga Futeból Amadora (LFA), ohin, katak kada jogu ho valór $2500, ho nia justifikasaun maka manán (%70) ka valór $1,750, lakon (%30) $750 no impata (%50) $1,250.

Enkuantu, totál hosi Lalenok nia jogu manán 9X1,750 =$15.750, lakon 2X750=1,500, no impata 3X1,250=3,750, no totál orsamentu ne’ebé hetan hosi prémiu jogu maka rihun $ 21.000.

Totál orsamentu ida-ne’e aumenta tan ho prémiu ba kampiaun Primeira Divizaun hamutuk rihun $15.000. Kampiaun Tasa 12 Novembru hamutuk rihun $15.000 no kampiaun Super Tasa rihun $15.000. Aleinde ne’e, iha mós orsamentu subsídiu hamutuk rihun $20.000. Tanba ne’e mak nia totál rihun $86.

 Fó hanoin hikas katak, antes ne’e, iha ona klube seluk ne’ebé mak sai kampiaun ba Primeira Divizaun LFA maibé maioria foin mak manán tasa rua. La hanesan ho Lalenok. Hanesan As Ponta Leste iha epoka 2016 manán Tasa 12 Novembru ho Super Tasa. Iha 2017, Karketu Dili FC kampiaun Primeira Divizaun ho Super Tasa. Iha 2018, Boavista FC Timor kampiaun Primeira Divizaun ho Super Tasa.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here