DILI, 24 outubru 2019 (TATOLI)-Rezultadu Konferénsia Internasionál nasaun membru Forum Organizasaun Instituisaun Nasionál Diretu Umanu iha Sudeste Aziátiku (SEANF), tersa (22/10/2019), aprova dokumentu Provedoria Diretu Umanu no Justisa (PDHJ-sigla portugés) ba protesaun diretu ema ho defisiénsia hodi implementa iha Rejiaun Sudeste Aziátiku.
Notísia Relevante : PDHJ Hala’o Semináriu Internasionál Kona-ba Protesaun Ema ho Defisiénsia
PDHJ maka sai uma na’in ba Konferénsia Internasionál SEANF durante loron tolu; hahú hosi loron 22 to’o loron 24 outubru, tinan ne’e, iha Timor Plaza Dili.
Nasaun sira membru SEANF sira maka Indonézia, Tailándia, Malázia, Filipina, Myanmar no Timor-Leste rasik
“Dokumentu ne’e agora sai ona dokumentu SEANF nian,” hateten Provedora Diretu Umanu no Justisa (PDHJ), Jesuína Maria Ferreira Gomes, ohin, hodi termina konferénsia internasionál SEANF.
Notísia Relevante : Semináriu Internasionál SEANF Prodús Ezbosu Haat
Provedora Jesuína Maria Ferreira Gomes, hateten, nasaun membru sira sei halo lansamentu ba dokumentu ne’e iha Indonézia tanba Indonézia maka sei lidera enkontru SEANF iha 2020.
Notísia Relevante : SEANF Sei Define Polítika ba Mudansa Klimátika
“Kuandu aprova ona membru hotu bele uza ona dokumentu ne’e hanesan referénsia ida para halo promosaun no protesaun ba diretu ema ho defisiénsia,” esplika Provedora Jesuína.
Membru SEANF lansa dokumentu ne’e iha Jakarta Indonézia, PDHJ mós iha ona planu sei halo lansamentu nivel nasionál hodi distribui ba ministériu no instituisaun relevante hodi implementa ba proteje diretu ema ho defisiénsia.
Konferénsia internasionál SEANF tinan oin iha Indonézia, tuir planu KOMNAS HAM nian katak sei realiza entre fin marsu ka inísiu Abril 2020.
Jornalista : Agapito dos Santos
Editór : Francisco Simões
