Prezidente Parlamentu Nasionál, Arão Noé de Jesus da Costa Amaral. Imajen/Tatoli

DILI, 24 outubru 2019 (TATOLI)–Prezidente Parlamentu Nasionál (PN), Arão Noé de Jesus da Costa Amaral hato’o mensajen lima iha Kongresu Nasionál Feto Timor-Leste 2019 ho tema “Feto Nia Asaun Determina Dezenvolvimentu Inkluzivu no Sustentável”, ne’ebé hala’o iha Centro Convencões Díli (CCD), kinta ohin.
Mensajen ba kongresista sira ne’e, lee hosi Vise Prezidente Parlamentu Nasionál, Angelina Sarmento ne’ebé reprezenta Prezidente PN hodi halo abertura ofisiál ba kongresu refere.

Mensajen lima hosi Prezidente PN ba kongresista sira mak hanesan, laiha buat ida kona-ba ita mak lahó ita, labele iha feto ne’ebé ita husik hela iha kotuk, maldade, timoridade no umanidade.

Bainhira lia-menon hirak ne’e haktuir ho liafuan seluk ne’ebé kontein ho vokabuláriu polítika, Arão propoin atu bele sumariza iha partisipasaun demokrátika, edukasaun no empoderamentu ka hakbiit aan, harii rede feto forte, feto Timor-Leste ba Timor-Leste no feto Timor-Leste ba umanidade, ba komunidade globál rasa umana nian.

Ho lia-menon lima ne’e, Prezidente PN iha esperansa katak ho intervensaun no iluminasaun oioin hosi órgaun soberania Timor-Leste nian, no panelista sira, kongresista sira bele hetan bukae, ne’ebé natón no nesesáriu atu kontribui ativamente, pro ativamente ba prosesu konstrusaun no rekonstrusaun hosi rai moris fatin Timor-Leste, ikus-liu ba rasa umanidade hotu iha mundu, iha ámbitu dezenvolvimentu ida-ne’ebé Inkluzivu no sustentável.

“Tanba ne’e, ita presiza re-afirma termu laiha buat ida kona-ba ita mak lahó ita”, Angelina lee.

Prezidente PN mós sita lema Rede Feto nian ne’ebé dehan, “Unidade na Diversidade”. Ne’e signifika, liuhusi diferensa oioin ne’ebé iha, unidade importante atu bele aprezenta no reprezenta didi’ak ita-nia aan iha ita-nia totalidade.

Tanba ne’e, Arão promete katak Parlamentu Nasionál liuhusi nia mandatu konstitusionál, lejizlasaun, fiskalizasaun no desizaun polítika, ho meiu oioin ne’ebé iha, inklui ninia komisaun sira ho Grupo Mulheres Parlamento Nacional Timor-Leste (GMPTL), prontu nafatin atu apoia Rede Feto Timor-Leste iha nia esforsu dezenvolvimentu ida-ne’ebé inkluzivu no sustentável.

Jornalista: Cipriano Colo
Editór: Xisto Freitas

HAKEREK NO HATÁN

Please enter your comment!
Please enter your name here