Prezidente Parlamentu Nasionál, Arão Noé. Imajen António Goncalves

DILI, 24 outubru 2019 (TATOLI) – Prezidente Parlamentu Nasionál (PPN), Arão Noé Amaral de Jesus da Costa Amaral, konsidera deklarasaun Deputada Bankada KHUNTO, Olinda Guterres hanesan opiniaun pesoál, tanba ne’e nia lakohi komenta deklarasaun deputada ne’e.

Iha loron hirak liubá, Deputada Olinda halo intervensaun iha plenária, kona-ba solusaun estrutura governu ne’ebé seidauk kompletu no akuza governasaun atuál benefísia de’it Ba partidu ida, enkuantu governu ne’e forma husi koligasaun partidária CNRT, PLP no KHUNTO, ne’ebé ho naran Aliansa Mudansa ba Progresu. (AMP).

Notísia Relevante: Deputada Olinda Kontinua Ezije Rezolve Membru Governu Pendente

“Deklarasaun ne’e la reprezenta deputadu hotu-hotu, ne’e opiniaun deputadu ida nian. Rejimentu mós fó dalan ema ida labele kestiona ninia intervensaun, maibé impaktu ka lae ne’e buat seluk no ha’u lakohi komenta”, tenik PPN iha resintu Parlamentu Nasionál (PN), kinta ne’e.

Arão Noé dehan, nu’udar Prezidente Parlamentu Nasionál, nia bele de’it haree ba kontekstu jestaun.

“Kona-ba polítika husik ba deputadu ida-idak ezerse ninia polítika liga ba ninia diresaun partidu”, nia akresenta.

Deklarasaun Deputada KHUNTO ne’e, halo ema reazen barak, liuliu Primeiru Ministru, Taur Matan Ruak, ne’ebé dehan bainhira laiha solusiona estrutura governu karik bele akontese Eleisaun Antesipada.

Jornalista : Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here