Koordenadór Jestaun Área Mariña Protejida iha Ataúru, Domingos Noronha Sarmento. Imajen/Florencio Miranda Ximenes.

ATAÚRU, 24 outubru 2019 (TATOLI) – Governu lokál, Konservasaun Internasionál (CI, sigla inglés) no populasaun Ataúru estabelese ona tara bandu iha setembru 2017, hodi deklara katak sei la luku tasi iha área mariña protejida.

Portavós no Koordenadór Jestaun Área Mariña Protejida Ataúru, Domingos Noronha Sarmento, hateten tara bandu ne’e ho hanoin ida katak proibe luku tasi atu estraga animál tasi hodi futuru sai rikusoin ba Ataúru ona nian.

Aléinde ne’e, atu konserva no prezerva balada tasi hanesan ikan, baleia, tubaraun, pari, ahu-ruin, lenuk no seluk tan.

Grupu Jestaun Área Marina Protejida mós kontinua halo kontrolu másimu atu peskadór ilegál labele tama iha área ne’e.

“Ita-nia peskadór ilegál mak tama área protejida ne’e sei selu multa tuir regulamentu tara bandu nian mak $100 to’o $500”, Domingos Noronha iha portu Ataúru, ohin.

Nia dehan bainhira hahú estabelese tara bandu, abitante balun la aseita, maibé kontinua halo sosializasaun ne’ebé sira hatene ona benefísiu bandu luku tasi iha área protejida sira.

Administradór Postu Administrativu Ataúru, Munisípiu Dili, Mateus Belo, dehan Governu lokál no sentrál apoia esforsu abitante sira-nia hodi estabelese tara bandu atu dehan lae ba luku tasi iha fatin protejida sira.

“Ita-nia komunidade deklara ona bainhira tama ilegál ne’e tenke selu multa”, afirma.

Mateus Belo dehan sei tuur hamutuk ho Ministériu Agrikultura no Peska, Sekretáriu Estadu Terras no Propriedade, Ministériu Turizmu, Komérsiu no Indústria no CI inklui autoridade lokál no abitante sira atu tau marka ba área protejida sira atu peskadór sira labele luku tasi.

“Ami servisu hamutuk ho Polísia Unidade Marítima no F-FDTL atu hamutuk ho grupu jestaun sira hodi kontrola”, katak.

Diretora Ezekutiva CI iha Timor-Leste, Trudiann Dale, husu ba populasaun sira iha Timor- Leste no rai-ketan Ataúru, atu dezenvolve no konserva natureza liuliu ba área tasi protejida 12 sei hetan benefísiu finanseiru hosi sira-nia konservasaun.

Área Marina Protejida ne’ebé estabelese ona iha Ataúru hamutuk 12 ho ektare 1300 kompostu husi suku Bikeli iha área tolu, Makadade área ida, Suku Beloi Villa neen no suku Villa Maumeta  rua.

Notísia relevante : CI-MAP Kria Área Marina Protejida 12 iha Illa Ataúru

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here