Diretór Fórum Organizasaun Naun Governamentál Timor-Leste, Daniel Santos do Carmo. Imajen TATOLI/Cipriano Colo

DILI, 24 outubru 2019 (TATOLI)–Sosiedade sivíl liuhusi Diretór Fórum Organizasaun Naun Governamentál Timor-Leste (FONGTIL), Daniel Santos do Carmo propoin ba polítiku-na’in sira atu buka komprende malu kona-ba diverjénsia polítika.

Daniel hatutan, bainhira hakarak halo diálogu, iha asuntu balun ne’ebé polítiku sira presiza tau iha ajenda mak buka atu komprende malu kona-ba diverjénsia polítika, tanba realidade ne’ebé eziste hodi dada impase to’o ohin loron mak diverjénsia polítika.

“Ita laiha konflitu, laiha violénsia, maibé iha de’it mak diverjénsia polítika entre líder sira”, dehan Daniel hafoin partisipa abertura Kongressu Nasionál Feto Timor-Leste 2019, iha Centro Convencões Dili, ohin.

Aleinde ne’e, tuir nia, bainhira hakarak atu halo duni diálogu, polítiku sira tenke diskute mós kona-ba oinsá hetan polítika ida-ne’ebé akomodativu entre líder opozisaun no sira ne’ebé kaer ukun.

Asuntu seluk tan ne’ebé sosiedade sivíl hakarak polítiku sira hamosu iha diálogu mak, Estadu tau hela prioridade atu dezenvolve setór Tasi Mane, tanba ne’e tenke iha komunikasaun di’ak entre líder sira atu intende malu, hodi fó apoiu ba malu liuliu iha polítika nune’e bele dezenvolve saida mak Estadu ida-ne’e hanoin atu halo, no oras ne’e halo hela investimentu ida-ne’ebé boot tebes.

Antes ne’e, Prezidente Parlamentu Nasionál (PN), Arão Noé de Jesus da Costa Amaral fó hanoin katak públiku kestiona no husu beibeik ba polítiku sira atu koloka diálogu, maibé laiha ajenda diálogu.

Membru Parlamentu Nasionál mós antes ne’e ezije diálogu no Prezidente Parlamentu rasik hola inisiativa hodi halo ajenda ida, halibur bankada hotu, no hahú diskute, maibé laiha rezultadu tanba ajenda diálogu laiha tanba lahatene diálogu ne’e atu ko’alia saida.

“Ita-nia problema loloos ne’e, saida mak ita hakarak atu diskute iha diálogu ne’e, tanba ita tenke tau asuntu ida iha diálogu ne’e mak bele diskute. Realidade atu diskute saida, hotu-hotu konfuzaun”, Arão subliña.

Tanba ne’e, Prezidente PN husu ba intelektuál sira, sosiedade sivíl sira, estudante no públiku ne’ebé koloka beibeik diálogu, nia husu tau tópiku, nune’e bele hatene kona-ba kontestu hosi diálogu ne’e rasik.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here