Asesór prinsipál MTKI, Jacinto Rigoberto. Imajen/TATOLI.

DILI 24 outubru 2019 (TATOLI) – Ministériu Turizmu Komérsiu no Indústria (MTKI) prevee ona orsamentu hamutuk rihun $100 hodi harii ka konstroe foun fali kapela Ramelau, tanba kapela tuan ahi han mutuk iha segunda (21/10/).

Aléinde harii kapela foun, sei hadi’a mós fatin tau fo’er no sinál sira ne’ebé tau iha fatin refere ne’ebé ahi han hotu.

Kona-ba situasaun ne’e, Asesór Prinsipál MTKI, Jacinto Rigoberto, hateten koordena ona ho diresaun relevante no daudaun ne’e tékniku hosi ministériu nian dezloka ona ba Ramelau hodi halo levantamentu no koordena ho parte igreja.

“Sobre kapela Ramelau ha’u konvoka ona ho diresaun relevante para haree oinsá halo levantamentu nune’e bele responde kedas tanba ami iha orsamentu atu hadi’a fali kapela no fatin sira iha Ramelau ne’ebé afeta hosi ahi han”, hateten asesór prinsipál ne’e ba iha Sentru Konvensaun Dili (CCD, sigla portugés), ohin.

Eis governante ne’e dehan, semana kotuk nia mós hala’o vizita bá Ramelau hodi selebra kontratu ho pesoál na’in-11 atu halo limpeza iha área refere.

“Atu hala’o serbisu iha Ramelau, maske antes ne’e iha ona pesoál seguransa na’in-hitu, no sira na’in-11 ne’e atu halo limpeza ba iha sítiu Ramelau nian”, dehan Jacinto.

Jacinto afirma : “Hafoin ami fila maka simu relatóriu katak ahi han iha sítiu Ramelau, ahi han la’ós de’it iha kapela, más hale’u foho tomak, no horiseik simu fali tan informasaun katak ahi han besik ona iha Santuáriu, ne’ebé ami halo konfirmasaun kedas ho Sekretáriu Estadu Protesaun Sivíl hodi apoia Bombeiru hodi hamate ahi”.

Ministru Turizmu, Komérsiu no Indústria interinu, Fidelis Manuel Leite Magalhães, triste tebes ho akontesimentu ne’e.

“Maibé ita rasik seidauk hatene loloos ahi han ne’e tanba sá? Maibé hakarak tebes atu apela ba sidadaun sira atu kuidadu para labele sunu rai arbiru. La’ós de’it uma maka ahi han más ema mós ahi han”.

Kona ba situasaun ne’e, Fidelis dehan Governu simu ona orientasaun hosi Primeiru Ministru, Taur Matan Ruak, para atua ho seriedade hodi rezolve situasaun sira ne’ebé komunidade enfrenta.

Notísia relevante : Governu Alerta Atu Kuidadu Ho Inséndiu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here