Ministru Obra Públika Salvador Soares dos Reis Pires. Imajen/Tatoli.

DILI, 24 outubru 2019 (TATOLI) – Ministru Obra Públika (MOP), Salvador Eugénio Soares dos Reis Pires, liuhusi reuniaun komité interministeriál ba dezenvolvimentu turizmu iha Timor-Leste, hatete Ministériu Obra Públika (MOP) prontu atu kria infraestrutura bázika iha sítiu turístiku sira.

Maibé, MOP husu atu Ministériu Turizmu, Komérsiu no Indústria (MTKI) atu identifika uluk sítiu turístiku sira ne’ebé sai prioridade, nune’e sira bele aliña iha sira-nia orsamentu.

“Ha’u hanoin iha ami-nia parte hanesan Ministériu Obra Públika ami prontu atu kolabora, maibé ami presiza liu maka identifikasaun área turístika ne’ebé presiza dezenvolve atu nune’e ami bele tau iha planu dezenvolvimentu estrada, eletrisidade no bee-moos. Ami presiza dadus fó mai ami para ami bele estabelese planu asaun no iha proposta Orsamentu Jerál Estadu kada tinan ami bele inklui iha planu asaun sira”, dehan ministru Salvador iha Sentru Konvensaun Dili, ohin.

Biban ne’e, Sekretária Estadu Komunikasaun Sosiál (SEKOMS), Merício Juvinal dos Reis “Akara”,  mós akresenta katak SEKOMS prontu atu hola parte iha promosaun, maibé presiza kolaborasaun hotu atu identifika fatin ne’ebé presiza atu promove.

“Mídia prontu atu promove fatin sira ne’ebé identifika, importante liu maka diskute konteúdu filozofia promosaun tenke kolabora para espíritu persepsaun ita-nian atu kolabora ne’e hanesan. Iha parte ospitalidade tanba liga ba oinsá bele simu ema, tan ne’e liuhosi mídia ita bele kontribui, programa ne’ebé dezenvolve no loroloron lansa iha mídia”, dehan Akara.

Antes ne’e, Ministru Koordenadór Asuntu Ekonómiku (MKAE) no Ministru Turizmu, Komérsiu no Indústria (MTKI) interinu, Fidelis Manuel Leite Magalhães, afirma Governu iha tinan oin sei foka liu ba halo planu mestre iha setór turizmu nian atubele identifika fatin potensiál iha Timor-Leste, nune’e bele kontribui ba ekonomia Timor-Leste.

“Planu mestre ne’e katak ba iha área hotu-hotu hanesan mapa jerál ida hodi Governu bele identifika ho fásilmente zona ida ne’e ita rezerva ba iha otél estrela lima, zona ida ne’ebá rezerva iha turizmu komunitáriu no zona ida ne’ebá ita rezerva liu ba laiha turizmu relijioza”, dehan Ministru Fidelis foin lalais ne’e iha Salaun João Paulo II Komoro.

Tanba ne’e maka halo planu mestre iha tinan oin ne’e atu Governu atinje meta ne’ebé iha tinan hirak nia laran.

Notísia relevante : MKAE Konvoka Reuniaun Interministeriál ba Dezenvolvimentu Turizmu iha TL

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here