Ministra Edukasaun, Juventude no Desportu (MEJD), Dulce de Jesus Soares. imajen/tatoli

DILI, 23 outubru 2019 (TATOLI) – Iha semana kotuk liubá, iha Rede Sosiál Facebook, viral ho vídiu Profesór ida-ne’ebé haruka ninia alunu feto na’in-rua rei-malu iha sala aula, hodi mosu diskusaun barak kontra vídiu ne’e.

Haree ba realidade, Ministra Edukasaun, Juventude no Desportu, Dulce de Jesus, lamenta no hateten kona-ba kazu ida-ne’e sei prosesu investigasaun nia laran, no bainhira ramata, Ministra rasik sei foti medida hasoru Profesór ne’e tanba nia hanesan mós Diretór Eskola Báziku Sentrál 20 Agostu, Ermera.

“Kona-ba lala’ok mestri ne’e nian, iha tempu badak ha’u sei halo sansaun preventiva ida bainhira prosesu investigasau remata ona. Prosesu ne’e hala’o hela tuir dalan legál tanba Ministeriu Edukasaun rasik iha Dekretu Governu ba Disiplina ba Profesór sira nian,”

tenik Dulce iha Palásiu Governu, kuarta ne’e.

Alende ne’e, hanesan líder másimu iha Ministériu Edukasaun, Juventude no Desportu (MEJD), husu deskulpa ba públiku tomak relasiona ho vídiu “la edukativu” ne’ebé lansa ida rede sosiál.

“Ha’u lori ministériu nia naran Profesór no Alunu hotu, husu deskulpa ba públiku tomak, ba inan-aman hotu no mós ba alunu na’in-rua”, nia dehan.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here