Ahi han uma lisan 13 iha Suku Abu, Postu Administrativu Quelicai, Munisípiu Baucau. Imajen foti hosi kronolijia Facebook Gabriel Martins Morreira.

DILI, 24 outubru 2019 (TATOLI) – Iha loron hirak liubá akontese inséndiu iha Ermera, Ramelau, Matebian no fatin seluk tan, ne’ebé halo ema hotu preukupa inklui reprezentante povu sira iha Uma Fukun.

Deputadu Bankada Frente Revolusionária Timor-Leste Indepedente (FRETILIN), Fabião de Oliveira, konsidera inséndiu hirak ne’e grave tebes tanba ne’e nia parte husu líder komunitáriu hodi tau matan.

Notísia Relevante: PN Sei Rekolla Dadus Vítima Inséndiu

“Ida-ne’e depende ba líder komunitáriu sira hodi haree oinsá bele kontrola, nune’e labele akontese tan tanba komunidade sira halo toos no sunu rai iha fatin hanesan, tanba ne’e presiza halo alargamentu ba fatin seluk”, nia tenik iha resintu Parlamentu Nasionál (PN), kinta ne’e.

Tuir nia, líder komunitáriu sira presiza haree komunidade hirak maka halo toos, nune’e mós ezekutivu sira tenke kria lejizlativa ida hodi regula ba atividade hirak ne’e.

“Governu tenke halo lei ne’ebé rigozu tebes ba komunidade no implementa kedas iha suku no aldeia sira, hodi bele indentifika ona komunidade hira maka halo toos, no muda ba fatin ida ba fatin seluk”, Deputadu Bankada Opozisaun ne’e akresenta.

Nia dehan tan, bainhira inséndiu maka la evita agora, kada tinan sei mosu hela de’it no bele fó impaktu ba bee moos tanba agora dadaun komunidade barak maka hela iha kapitál Dili, enkuantu munisípu barak maka falta be moos.

“Ha’u hanoin ita bele taa ai no sunu ai maibé presiza mós iha tinan ida nia laran bele kuda fila-fali ai-hun. Tanba ne’e populasaun hotu tenke kuda ai-hun ida atu nune’e udan tun karik nia moris fila-fali atu kaer metin rai no haburas ita ninia ambiente  no konserva bee iha rai okos”, Fabião dehan tan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here