Diretor TradeInvest Timor-Leste, Arcanjo da Silva. Imajen/Tatoli.

DILI, 24 outubru 2019 (TATOLI) – Diretór TradeInvest Timor-Leste, Arcanjo da Silva, informa tendénsia agora, investidór internasionál sira atu mai investe iha Timór iha setór turizmu sempre hakarak halo investimentu integradu.

“Sira (investidór internasionál) hakarak investe iha otelaria, hakarak integra ho kazinu, ne’e tendénsia, ami simu proposta investimentu barak tebes maibé ita laiha lei kazinu, dala barak ha’u halai bá halo diskusaun ho asesór prinsipál Ministériu Turizmu, Komérsiu no Indústria, tanba lei laiha entaun sira fila de’it”, dehan Diretór TradeInvest iha ámbitu reuniaun komité interministeriál ba dezenvolvimentu turizmu iha Sentru Konvensaun Dili, ohin.

Arcanjo da Silva hatutan, kuandu investidór internasionál sira fila de’it, hahú ko’alia ona katak difisil tebes atu halo investimentu no atendimentu ba sira ladi’ak.

Ministru Koordenadór Asuntu Ekonómiku (MKAE), Fidelis Manuel Leite Magalhães, dehan atu lori investimentu jogu kazinu mai Timor-Leste tenke prepara didi’ak sosiedade hodi simu investimentu boot ne’e.

“Uluk kedas membru Parlamentu Nasionál sira husu mai ha’u katak tanba sá maka la lori investimentu boot ne’e mai Timor-Leste. Ha’u hakarak dehan, atu lori investimentu boot ne’e presiza servisu ho sosiedade tomak atu prepara aan hodi simu. Jogu ne’e ajuda ona ita dezenvolve, más nia tama lori buat barak mai, ne’ebé importante maka sosiedade tenke aseita”, afirma governante ne’e.

Ba ida ne’e, komité tékniku hosi interministeriál sira mós atu tuur hamutuk fali hodi haree.

“Investimentu boot sira hanesan jogu presiza sosiedade tomak nia kolaborasaun, no komité ne’e sei halo diskusaun alargada ida hodi haree kle’an liután”, katak.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here