Ilustrasaun

DILI, 24 outubru 2019 (TATOLI)—Diretór Nasionál Farmasia Medikamentus no Diretór Jerál Prestasaun Saúde interinu, Delfin da Costa Xavier Fereira, hateten Ministériu Saúde liuhusi Diresaun Nasionál Saúde Públika hala’o workshop ho tema “Diseminasaun Matadalan Nasionál Ba Profísionál Saúde Sira Hodi Bele Atende Violénsia Bazeia Ba Jeneru Inklui Violénsia Husi Parseiru Íntimu” ba profísionál saúde sira husi munisípiu 12 inklui RAEOA.

Iha workshop ne’e ko’alia kona-ba matadalan ba atende violénsia, diretór ne’e haktuir, iha orsamentu 2019 no agora ba 2020 Governu kompremitidu ona atu tau aloksaun hodi harii Uma Hakmatek iha munisípiu sira ne’ebé identifika tiha ona no prosesu konstrusaun hahú la’o daudaun ona.

Harii Uma Hakmatek, tuir nia, hanesan parte ida atu asegura privasidade husi vítima sira ne’ebé mak kategoria ba violénsia. Polítika ida ne’e, atu hatán ba iha polémika sira ne’ebé mak mosu iha komunidade katak Governu halo diskrimisaun atendimentu iha saúde, espesiál ba vítima sira ne’ebé mak ho kazu violénsia.

“Atu harii uma hakmatek ba vitima violénsia bazeia ba jeneru ita tau uluk iha munisípiu neen hanesan Baucau, Viqueque, Ermera, Maliana, Same no Lautem ne’ebé iha ona prosesu tenderizasaun ho total orsamentu kada uma hakamatek $5.000. Munisipiu seluk, ami sei haree fatin hodi konstrui iha 2020,” dehan Delfin da costa Xavier Fereira liuhusi nia diskursu.

Nia hateten, oras ne’e Timor-Leste iha ona polítika nasionál no lei barak mak produs nu’udar komitmentu estadu nian. Ezemplu, nia fó hanoin, iha Konstituisaun Repúblika Demokrátika Timor-Leste iha kodigu penál ba lei kontra violénsia domestika no tau mós iha planu asaun nasionál ba tinan tolu hahú husi tinan 2015 to’o 2019.

Alende harii Uma Hakmatek, nia hatutan, iha tinan 2015 Ministériu Saúde kria ona ekipa instaladór ida no ekipa traballu lori konsultasaun no halo ona aprezentasaun ba iha konsellu diresaun no mós ba iha munisípiu sira tanba Governu iha ona matadalan ba iha violénsia ba jéneru.

Diretór Nasionál Farmasia ne’e informa, estratejia Oganizasaun Mundiál Saúde ne’ebé koopera ho Timor-Leste ne’e hatudu katak Governu liuhusi Ministériu Saúde iha seriedade atu bele haree matadalan ba violénsia jeneru no oinsá mak bele fasilita serbisu no aprosimasaun ba vítima sira banhira hetan kazu violénsia.

Tanba ne’e, nia garante ba Pesoál Saúde sira mak sai hanesan fornesedór no iha jeitu treinadu ba atendementu no responsabilidade hodi atende kazu violénsia ne’ebé tuir peskiza katak violénsia jeneru sei maka’as akontese iha Timor-Leste.

Matadalan ida ne’e, tuir nia, atu tulun profísionál saúde sira-nia koñesimentu no abilidade liuliu Ministériu Saúde iha knaar importante atu prevene ba violénsia bazeia ba jeneru hanesan serbisu promosaun saúde bele entegra iha promosaun nian.

“Hakarak agradese ba parseiru sira husi organizasaun saúde mundiál ne’ebé tulun no haforsa ona setór saúde ba prevensaun, ita bele fó resposta ba violénsia bazeia ba jeneru. Espera katak husi ita-boot sira-nia apoiu kontinuasaun iha futuru no atu haforsa liután papel Ministeriu Saúde, pesoál saúde sira atu bele kontribui serbisu di’ak liuliu iha parte prevensaun nian ba kazu violénsia bazeia ba jeneru nian,” nia dehan.

Jornalista: Felicidade Xiemenes

Editór      : Rafy Belo

HAKEREK NO HATÁN

Please enter your comment!
Please enter your name here