Ilustrasaun

DILI,24 outubru 2019 (TATOLI)-Iha tinan 2019, Ministériu Saúde (MS) rejista kazu moras dengue hamutuk 975 kompara ho tinan 2018 iha kazu dengue  330.

Vise-Ministra Kuidadu Saúde Primária, Elia dos Reis Amaral. Foto TATOLI: Felicidade Ximenes

“Ema na´in ualu mak lakon nia vida tan moras dengue,” relata Vise-Ministra Kuidadu Saúde Primária, Elia dos Reis Amaral, iha ámbitu semináriu subordinadu ho tema Advokasia, Hateten Lae ba Dengue perante OMS, Adjuntu autoridade Munisípiu Dili, lider komunitáriu, profesór, estudante inklui profisionál saúde, iha salaun Palásiu Sinza, Caicoli, kuarta ne´e.

Tuir ministra, iha Timor-Leste moras  ne´ebé da´et husi susuk mak malaria, filariasis no dengue. Moras tolu ne´e sai problema boot ba saúde públika iha rejiaun sudeste aziátiku.

Timor-Leste mós sai nu’udar nasaun ida ne’ebé mak endemika ba moras dengue tanba tinan-tinan sempre akontese numeru kazu maka´as liuliu iha tempu udan monu rai.

“Dengue hanesan moras kontajioza ida husi kauza virus dengue ne’ebé mak trasmite ba ita ema liuhusi susuk aedes aygipti no aedes albopictus ninia tata. To’o ohin loron seidauk iha tratamentu espesífiku ida atu kura dengue signifika bainhira ema ida hetan moras dengue sei la iha ai-moruk ida ne’ebé mak bele hamate virus dengue,” hateten Vise-Ministra Elia.

Nia esplika, tratamentu ne’ebé fó pasiente ne’e hanesan tratamentu ne’ebé mak ajuda pasiente atu alivia de´it sintoma ne’ebé pasiente iha gravidade husi moras dengue.

Susuk Aedes aygipty no susuk Aedes albopictus hanesan trasmitidór moras dengue nian moris iha komunidade sira nia le’et, susuk rua ne’e normalmente moris iha ita-nia uma laran ka iha uma ninin.

“Sira (susuk) gosta rai sira-nia tolun iha fatin hirak ne’ebé iha bee-lihun hanesan bidon no tanki bee nian, vaju ai-funan, roda, lata, nu’u kakun no buat seluk tan ne’ebé bele rai iha bee, no buat sira ne’e hotu ita bele hetan iha komunidade nia leet no tolun hirak ne’e mak sei nakfila ba susuk adultu ne’ebé iha kapasidade atu tata no trasmite moras dengue ba ita”.

Nia esplika tan katak moras dengue ne´e mosu tanba mós sistema fornesimentu bee moos  ne´ebé la adekuadu, jestaun lixu ne´ebé la adekuadu no mós menus koñesimentu komunidade nian hodi halo prevensaun ba moras ne´e.

“Mudansa klimátika mós fó nia impaktu ba iha aumenta husi moras ida ne’e tan rai ne’bé manas halo kresimentu husi susuk ne’e la´o ho lalais. Husi fatór ka situasaun hirak ne’e kuaze fatór hotu-hotu ne’ebé mak ita bele hadi´a atu labele favorese akontesimentu moras dengue mai ita,” dehan Vise-Ministra ne´e.

Governante ne´e hateten, MS iha programa atu kombate dengue liuhusi promosaun, edukasaun saúde kona-ba dengue no oinsá halo prevensaun kontrolu ambientál liuhusi fahe abate no halo fomigasaun ba área risku no Ministeriu Saúde mós prepara ona pesoál saúde sira atu bele halo atendimentu própriu no adekuadu ba pasiente ho moras dengue.

Di´ak Liu Prevene Duke Kura

Tuir provérbiu, di´ak liu prevene antes duke kura sai hanesan prinsipiu ida iha programa kompresivu kombate dengue no Ministériu Saúde mesak labele atu konsegue ida ne’e. “Ohin loron ami hakarak fahe servisu ida ne’e ba ita-boot sira husi lider komunitáriu tanba ami hatene katak ita-boot sira mak besik liubá komunidade no iha kapasidade atu halo intervensaun ba hadi´aa kualidade moris inklui saúde ne’ebé di’ak ba komunidade”.

Vise-Minstra Elia hateten, lider komunitáriu inklui lider relijiozu sira iha papel boot tebes iha prevensaun moras dengue nian, liuhusi funsaun hanesan edukadór saúde nian ne’ebé fahe informasaun no eduka komunidade kona-ba dengue ho ninia prevensaun no mós liuhusi funsaun hanesan mobilizadór ativu ida iha komunidade nia leet ne’ebé sei ajuda komunidade atu hamoos no mantein ambiente ne’ebé mos no saudavel.

“Ho tulun husi lider komunitária sira mak ita bele kombate situasaun hirak ne’ebé mak hamosu moras dengue hanesan jestaun ne’ebé la adekuadu ba kontentór bee ne’ebé komunidade sira uza, hadi´a jestaun lixu no aumenta koñesimentu kona-ba moras dengue”.

Ministeriu Saúde hakarak hetan kompromisu ida husi lider komunidade atu bele servisu hamutuk liuliu iha prevensaun moras dengue nian, tan moras dengue bele hamate ka bele oho ema liuliu labarik sira.

“Tinan ida ita lakon ona ita-nia labarik na´in ualu ida menus husi tinan 15, ita lakohi ida ne’e atu akontese iha tinan sira mai ne’e. Tan ne’e, dala ida tan ami husu ita-boot sira atu servisu maka’as ho ami ho ita boot sira nia tulun. Ami fiar katak ita sei bele hamenus moras ne’e iha ita-nia komunidade nia leet.  Mai ita hamutuk hatete lae ba dengue, mai hamutuk proteje ita-nia komunidade husi moras dengue,” nia konsidera.

“Ami fiar katak ho servisu hamutuk ne’ebé mak di’ak ita sei bele hamenus moras dengue ne’e iha ita-nia rain. Dala ida tan mai hamutuk hateten lae ba dengue, mai hamutuk proteje ita-nia komunidade husi moras dengue ita-boot sira mak sai hanesan save ba susesu programa komprensivu kombate dengue nian,” friza governante ne´e ne´e.

Iha fatin hanesan, Reprezentante Xefe Departementu Moras Hada’et, Chenna Viegas liuhusi diskursu hateten, semináriu advokasia “hatete lae ba dengue “, ida ne’e ita fahe informasaun katak saida mak dengue, oinsá ita bele hetan moras dengue no oinsá atu prevene ita nia aan moras dengue, ba ita nia lider komunitariu no lider relijiozu sira ho objetivu advokasia mak atu hamosu no haforsa partisipasaun ativa na´in ulun sira iha implementasun programa komprensivu kombate dengue nian.

Iha tinan ne’e ho apoiu tkniku no Orasamentu husi Organizasaun Mundiál Saúde (OMS), ho MS realiza no fó treinamentu ba voluntáriu sira kona-ba dengue, no nia prevensaun no distribusaun abate ba komunidade iha Munisípiu Baucau, Dili, Ermera, Liquiça, Manatuto no Manufahi ne’e nafatin ajuda husi OMS.  Tuir planu, loron 7 novembru 2019, MS sei halo lansamentu atendementu mobilizasaun iha komunidade, iha Liquiça.

“Ba mobilizasaun ida ne’e ami prezisa tebes partisipasaun másimu husi lider komunitáriu sira inklui lider relijiozu sira atu bele bolu no hafanu ita-nia komunidade hodi kuidadu ambiente ho di´ak,” nia salienta.

Notísia relevante:Moras Dengue Hamate Ona Labarik Nain Haat

Udan Monu Rai, Tempu Atu Kuidadu Família Hosi “Dengue”

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here