Bispu Dioseza Maliana, Mgr. Norberto do Amaral prezide missa agradesimentu ba inaugurasaun Igreja Bobonaro, tersa (22/10/2019). Imajen/GPM

DILI, 24 outubru 2019 (TATOLI) Igreja Nossa Señora Imaculada Conceição Bobonaro iha Postu Administrativu Bobonaro, Munisípiu Bobonaro, tersa (22/10/2019), ofisiálmente inaugura ona hosi Governu no hetan bensaun tuir lisan Kristaun Katóliku nian hosi Bispu Dioseze Maliana, Mgr. Norberto do Amaral.

Bispu Dioseze Maliana, Mgr. Norberto do Amaral. Imajen/GPM

Iha ritual inaugurasaun ne’e Bispu Dioseze Maliana,  Mgr. Norberto do Amaral, lori ai-tonka bispu nian hodi dere odamatan boot Igreja dala tolu nu’udar sinál Igreja inaugura hodi utiliza kedas ho misa agradesimentu dahuluk.

Serimónia ne’e partisipa direita hosi padre no madre Dioseze Maliana nian tomak hamutuk ho sarani Postu Administrativu Bobonaro.

Igreja Bobonaro halo konstrusaun foun totál ho naruk metru 30 no luan metru 22, rekonstrui iha fatin Igreja antigu ne’ebé eziste ona tinan 70 resin.

Padre Pároku Bobonaro no sarani sira deside halo Igreja foun, tanba kondisaun uma Igreja ne’e tuan ona, nune’e Padre Pároku hato’o proposta ba governu hodi deside harahun igreja antigu hodi harii foun fali komesa tinan 2015 too 2019.

Komunikadu imprensa ne’ebé Ajénsia TATOLI asesu relata katak, orsamentu ba konstrusaun igreja ne’e mai hosi  Governu Timor-Leste nu’udar subvensaun públiku liuhasi Gabinete Apoiu Sosiedade Sivíl (GASS) ho orsamentu $599.995.97 no mós hetan kontribuisaun hosi sarani no emprezáriu Bobonaro-oan sira ho montante rihun $150.000- resin, ho totál gastu ba obra  ne’e too remata hamutuk $704. 285.79.

Don Norberto Amaral hato’o agradese tebes ba laran luak Governu nian ne’ebé ajuda ona Uma Kreda hodi harii obra Igreja Bobonaro ne’ebé furak tebes.

“Aproveita fó nia haklu’ak boot ba Primeiru-Ministru, Taur Matan Ruak ho dezeju ukun di’ak no ukun ho domin,”  hateten Bispu Norberto Amaral iha nia omilia.

Bispu mós agradese ba inisiativa padre Pároku Bobonaro Pedro Noronha do Nascimento ho sarani sira ne’ebé esforsu maka’as, ikus mai bele finaliza obra ne’e.

Bispu husu ba sarani Bobonaro sira atu kuidadu no tau matan Igreja ne’e nu’udar uma orasaun nian.

Iha fatin hanesan Koordenadór Gabinete Apoiu Sosiedade Sivíl ba Gabinete Primeiru Ministru, Filipe da Costa ne’ebé reprezenta Primeiru-Ministru iha serimónia ne’e hateten, fundus ba harii Igreja ne’e nu’udar polítika Governu nian atu hadi’a infraestrutura Igreja nian, nune’e bele fasilita sarani sira nia devosaun, tanba Igreja mós foti papél importante iha aspetu sosiál-umana nian kona-ba oinsá bele muda sarani sira nia karater hodi kontribui ba prosesu dezenvolvimentu nasionál.

Iha serimónia ne’e, Filipe esplika ba sarani tomak katak, Primeiru-Ministru Taur la marka prezensa iha inaugurasaun ne’e tanba koinsidénsia ho ajenda hasoru malu ho Prezidente Repúblika hodi diskute programa governu nian.

Hola parte iha serimónia inaugurasaun Prezidente Autoridade Munisípiu Bobonaro, Komandante PNTL Munisípiu Bobonaro, Administrador Postu Administrativu Bobonaro, Xefe Suku 18 no sarani 500-resin.

Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here