Adjuntu Xefe Kurríkulu CSM, Agostinho Soares de Araújo. Foto TATOLI: Nelia Borges

DILI, 23 outubru 2019 (TATOLI)-Eskola privada Koléjiu São Miguel (CSM), Comoro, Dili, alende atividade létiva, liuhusi fundasaun promove mós formasaun jornalizmu, inklui atividade ekstra-kurrikulár sira ba estudante sira iha estabelesimentu ensinu ne´e.

“Eskola ne’e iha kelebihan. Ida mak labarik sira barak aprende liu kona-ba jornalismu. Estudante sira, tantu iha Ensinu Báziku depois Ensinu Sekundáriu Tékniku Vokasionál,” rekoñese Adjuntu Xefe Kurríkulu CSM, Agostinho Soares de Araújo bainhira entrevista ho jornalista Ajénsia TATOLI, iha nia kna´ar fatin, CSM, Comoro-Dili, kinta ne´e.

Nia konsidera katak jornalista sira iha televizaun privada, TVE (Televizaun Edukasaun) ne´e maioria husi estudante sira iha CSM ne´e rasik.

“Estudante sira iha nível ensinu sekundáriu tékniku vokasionál sira ne’e mak toma konta ba iha televizaun parte ba iha cameraman. Depois ba iha aprezentadór sira, ba iha komentatór lori komentáriu ruma, ne’e mai husi estudante sira,” dehan profesór ensinu privadu ne´e.

Manorin na´in CSM, Agostinho Soares de Araújo kompara katak CSM ne´e diferente ho eskola sira seluk, tantu privadu ka públiku.

“Iha ne’e sira direita kedas uza sasán ne’ebé iha, sira la iha eskola katak  sira la’os tuir teória mak foin aplika, ba aprende pratika ne’e lae maibé sira direta kedas ba aprende kamera, ohin kalan sira aprende aban sira uza hatene kedas tuun ba kampu”.

“Sira aprende oinsa sai presenter, ohin sira koko aban publika ona ba públiku liuhusi Televisaun Edukasaun. Ida ne’e mak ninia kelebihan; buat ne’ebé eskola ida ne’e halo liuhusi televizaun,” nia reforsa tan.

Iha biban hanesan, Adjuntu Xefe Kurríkulu CSM, Agostinho Soares de Araújo esklarese liután katak atividade seluk iha estabelesimentu ensinu privadu ne´e mak inkluzivamente asosiasaun estudantil, promove mós atividade estra-kurrikulár sira seluk hanesan atividade desportiva no kompetisaun.

Estudante sira-nia koñesimentu, abilidade, liuliu iha kultura, diskursu públiku (public speaking), poezia, moda (fashion show). “Iha parte haat ne’e mak espertu loos ba labarik sira iha eskola ida ne’e sempre aprezenta,” konsidera manorin na’in ne’e.

Nia hatutan, iha nível interna eskola, dalaruma eskola realiza selebrasaun eskola nia loron no selebra televizaun nian.

“Eskola Koléjio ne’e sempre loke kompetisaun. Konvida ita-nia maluk sira husi munisípiu seluk, munisípiu 12 ho Rejiaun Autonomia Administrativa Espesiál Oe-cusse-Ambeno no mós husi eskola sira ne’ebé iha Dili laran sempre partisipa, entaun labarik sira mós iha, hanesan na’in ba eskola ne’e, sira tuan rumah (uma na´in ka infitriaun), sira mós lakohi lakon hola parte,” dehan manorin ne’e.

Manorin ne’e salienta liután, ida seluk mós sira (estudante) hetan konvite, sai konvidadu mós ba iha kompetisaun seluk iha li´ur no sira mós kontribui mós taxa balun ne’ebé ba eskola ida ne’e. “Liuhusi sira-nia talentu, sira-nia abilidade no sira-nia koñesimentu ne’ebé iha”.

“Iha ne’e liuliu ita liga ba atividade ekstra kurrikuler naun-formál ninian, eskola ne’e ita hatene, iha mós ita-nia estasaun Televizaun Edukasaun Timór, iha media mós iha ne’e,” konklui salienta Manorin na’in,  Agostinho Soares de Araújo, ne’e.

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here