Ministru Defeza no Seguransa no Ministru Interiór ein ezersísiu, Filomeno da Paixão de Jesus.Imajen TATOLI/Egas Cristovão

DILI, 23 outubru 2019 (TATOLI) – Ministru Defeza no Seguransa no Ministru Interiór ein ezersísiu, Filomeno da Paixão de Jesus, hateten tinan oin sei laiha rekrutamentu ba membru Polisia Nasionál Timor-Leste (PNTL) foun ho razaun atu hadia uluk lakuna ne’ebé instituisaun ne’e infrenta.

Nune’e mós hanesan parte ida atu integra forsa rua hanesan PNTL no FALINTIL-Forsa Defeza Timor-Leste (F-FDTL), ne’ebé sei foti husi forsa ne’ebé iha ona.

Notísia Relevante: Dezenvolvimentu PNTL no F-FDTL Hahú Integradu

“Ha’u hatete ona, PNTL laiha rekrutamentu tanba tenke hadi’a uma laran no disiplina. Hafoin hadia komandu ho buat sira ne’e hotu la’o loos maka ita rekruta fali”, tenik governante ne’e iha Palásiu Governu, kuarta ne’e.

Nia konsidera, númeru ba membru PNTL sufisiente atu ezekuta orden, maibé durante ne’e komandu maka seidauk fahe serbisu ho loloos.

Antes ne’e, governante ne’e dehan la’ós kestaun labele aumenta PNTL maibé F-FDTL tenke iha ema na’in-3.600 tuir lei, ezemplu bainhira iha ona na’in-3.000, soldadu na’in-600 tenke troka bebeik, entaun bainhira forsa ne’e la uza bele integra de’it ba polísia.

Maski nune’e, PNTL iha planu tinan 2019 atu halo rekrutamentu ema na’in-520 maibé rekrutamentu ne’e kanseladu no adia ba tinan 2020, tanba tuir Primeiru-Ministru, Taur Matan Ruak, konsidera orsamentu ba PNTL ultrapasa husi tetu ne’ebé Ministériu Finansa (MF) fó, maskeli tuir instituisaun nia hanoin ida-ne’e importante tanba atu reforsa efetividade iha terrenu.

Iha orsamentu 2019, PNTL propoin millaun $39 resin ba atividade operasionál sira hanesan kombustível, alimentasaun, kompra viatura hodi suporta operasionál iha terrenu hanesan patrullamentu, tránzitu no unidade espesiál sira nia serbisu.

Dadaun ne’e, membru PNTL iha ona 3.000 resin ne’ebé destakadu iha eskuadra no postu seguransa sira, inklui ofisiál polísia suku iha territóriu tomak.

PNTL rasik sei menus rekursu umanu hodi reforsa instituisaun polísia liu-liu Ofisiál Polísia Suku (OPS) no Polízia Tránszitu ne’ebé sei menus.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here