Vise Xefe Estadu Maior Jenerál FALINTIL-Forsa Defeza Timor-Leste (F-FDTL), Brigadeiru Jenerál Falur Rate Laek. Imajen Egas Cristovão

DILI, 23 outubru 2019 (TATOLI)–Kritéria rekrutamentu ba membru FALINTIL-Forsa Defeza Timor-Leste (F-FDTL) foun, sei fó prioridade ba sidadaun hotu, maibé la’ós prioridade de’it ba veteranu libertasaun nasionál nia oan.

Deklarasaun ne’e fó sai hosi Vise Xefe Estadu Maiór F-FDTL, Brigadeiru Jenerál Falur Rate Laek, hafoin enkontru regulár ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, ohin.

Falur dehan, kritéria ba rekrutamentu forsa foun órgaun soberania Governu mak sei halo, bazeia ba nasionalizmu no ba timoroan hotu, nu’udár kritéria jerál ne’ebé fó oportunidade ba sidadaun hotu atu kompete, no sé mak la prenxe kritériu labele hola parte iha instituisaun defeza.

Falur fó ezemplu katak sira ne’ebé labele kompete mak sira ne’ebé analfabetu, moras no sira ne’ebé la’ós timoroan.

“Ne’e atu dehan katak kritéria rekrutamentu sei la fó prioridade ba veteranu nia oan, maibé fó oportunidade ba timoroan hotu,” Falur subliña.

“Lalika fiar informasaun sira ne’e, tanba lei ne’e hateten katak sidadaun Timor ne’e ida de’it. Laiha sidadaun integrasaun. Laiha sidadaun otonomista. Laiha sidadaun bui-huu ho mau-huu. Sidadaun hotu sistema mak regula”, nia dehan tan.

Falur mós respeita ninia Xefe Estadu Maiór Jenerál F-FDTL, Majór Jenerál Lere Anan Timur hanesan ninia komandante, ne’ebé antes ne’e deklara katak sei la simu milísia nia oan iha instutuisaun F-FDTL no hatutan katak Lere iha direitu atu ko’alia hanesan ne’e.

“Favór ba husu rasik iha Xefe Estadu Maiór atu fó resposta tanba ida-idak mak hatan”, Falur afirma.

Durante enkontru ho Prezidente Repúblika, Falur mós aprezenta kona-ba preparasaun hosi parte téknika oinsá prepara kondisaun, maibé desizaun sei iha Konsellu Ministru (KM), depois sei hetan aprovasaun hosi Parlamentu Nasionál (PN) hafoin bele halo rekrutamentu.

Kona-ba asuntu ne’e, nia esklarese, Prezidente Repúblika fó resposta pozitiva no fó orientasaun atu halo buat ne’ebé di’ak no hadi’a buat ne’ebé ladi’ak, nune’e fó rezultadu di’ak ba nasaun no rai ida-ne’e hodi haburas demokrasia no evita hamosu ultra-demoktratizmu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here