Enkontru entre Prezidente Parlamentu Nasionál, Arão Noé de Jesus da Costa Amaral no Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, kuarta ne'e. Imajen Mídia PR

DILI, 23 outubru 2019 (TATOLI)–Prezidente Parlamentu Nasionál (PN), Arão Noé de Jesus da Costa Amaral, haktuir Prezidente Repúblika (PR), Francisco Guterres Lú Olo preokupa ho orsamentu jerál Estadu (OJE) tinan 2020 ne’ebé aprezenta hosi Governu ho montante boot tebes.

“Ha’u informa mós kona-ba orsamentu jerál Estadu 2020 ne’ebé baixa ona ba komisaun sira, maibé Prezidente Repúblika preokupa tanba OJE boot ho montante biliaun $1.9,50 kedas. PR preokupa tanba ita foti liu pursentu tolu tuir lei haruka. Ita mós preokupa ho asuntu ne’e, maibé hein katak iha diskusaun Governu bele justifika didi’ak ninia programa, liga ho kondisaun eskola sira, ospitál sira no seluk-tan atu ita bele haree”, Arão dehan ba jornalista sira hafoin enkontru regulár ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, ohin.

Nia haklaken, hafoin aprezenta kona-ba orsamentu, Prezidente Repúblika mós rekomenda ba Parlamentu Nasionál atu halo debate kle’an orsamentu ne’e rasik, nune’e, sosiedade sivíl no públiku bele akompaña didi’ak konteúdu no planu orsamentu ne’e inklui ninia prosesu ezekusaun.

Aleinde ne’e, Arão dehan tan, Xefe Estadu mós husu ba deputadu sira atu labele para iha fiskalizasaun no labele halo de’it fiskalizasaun ba iha fíziku maibé haree mós ba kolokasaun orsamentu iha eskola sira no ministériu sira katak osan ne’e tenke to’o duni iha baze.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here