Eskola Sekundáriu Tékniku Vokasionál (ESTV-Ekonomia no Komérsiu). Foto TATOLI: Nelia Fernandes

DILI, 23 outubru 2019 (TATOLI)—Diretór Eskola Ensinu Sekundária Téknika Vokasionál-Eskola Ekonomia no Komérsiu (ESTV-EEC) Becora, Aderito Luis da Costa, informa Sekolah Menengah Ekonomi (SMEA) ne’e harii iha tempu okupasaun Indonézia nian.

Tanba ne’e, atu hatene kle’an liu kona-ba eskola refere, Ajénsia TATOLI sei haktuir perfil kona-ba eskola Ensinu Sekundáriu ne’ebé lokaliza iha Becora, Dili, Timor-Leste ne’e.

Naran : Eskola Sekundáriu Tékniku Vokasionál (ESTV-Ekonomia no Komérsiu).

Harii: Iha tinan 1983/1999.

Fundadór Hafoin Ukun-Aan: Armindo Soares Sarmento, Calisto da Costa, Francisco Lobo Pereira, Antônio Rangel Pinto no Aderito Luis da Costa

Lema: Atu eduka estudante sira oinsá hatene kona-ba ekonomia iha rai laran no mós ba hatene ekonomia rai li´ur. Ekonomia rai laran ne’e estuda kona-ba finansas, komérsiu, estuda kona-ba buat barak tanba ne’e mak ami tau eskola tekniku vokasionál.

Totál Profesor: Hamutuk na’in 75 (permanente na’in 49, kontratadu na’in 20, mate na’in 2, Governu hapara na’in 4).

Totál Estudante: Ema na’in 874 kompostu husi Departamentu Kontabilidade na’in 306, Departamentu Sekretariadu na’in 285 no Departamentu Komersiu na’in 283.

Objetivu Hari’i Eskola: Atu eduka estudante ne’e sai ema di’ak, sai matenek no sai rikusoin ba rai ida ne’e, ba estadu, Governu no ba povu ida ne’e.

Vizaun: Liuhusi eskola ida ne’e sira bele aumenta sira-nia matenek no koñesimentu para bainhira sira remata sira-nia eskola ida ne’e karik, sira bele serbisu mesak oinsá atu halo Jestaun no bele haburas fila fali kona-ba ekonomia rai laran ninian.

Misaun: Hakarak atu haburas no halo estudante sira sai matenek ba sidadaun Timór ida ne’e liuliu ba estudante ne’ebé estuda kona-ba komersiu atu hatutan matenek ida ne’e ba jerasaun foun sira para bele kontinua nafatin ita-nia ekonomia ida ne’e bele buras liután

Sala de Aulas: Hamutuk 18 (foin lalais projetu mai husi Governu liuhusi Ministériu Edukasaun mai hadi’a sala ualu (8) de’it.
Biblioteka: Seidauk iha.

Fasilidade Eskola: Komputer 20 ba nesesidade prátika maibé la sufisiente tanba Klase I, II to’o III atu prátika hadau malu iha fatin ida de’it.

Konsellu Sira: Eskola refere iha Kensellu Profesór, Konsellu Pais (inan-aman) no Konsellu Estudante.

Husi 1999 t’oo ohin loron, eskola ne’e prodús rekursu umanu barak ona ne’ebé balun oras ne’e sau doutor, forsa, balun sai dosente iha UNTL, UNDIL, UNITAL ho IoB no balun agora sai madre no balun iha Parlamentu Nasionál.

Lia Tatoli: Ami fó hatene ba estudante sira tomak ne’ebé iha teritóriu Timor laran tomak la’os iha Dili laran de’it, hirak ne’ebé akaba ona eskola ensinu Pre-Sekundária karik, odamatan Eskola Sekundária ESTV-Eskola Ekonomia no Comersiu de Becora (ESTV-EEC) Becora nakloke ba ema hotu. La taka dalan ba sé de’it mak iha vontade boot hakarak mai kontinua iha eskola ida ne’e ami simu ho liman rua. Ami prontu nafatin iha 24 horas, hein sira to’o sira tama mai iha inskrisaun.

Sujestaun: Ami-nia sujestaun liuliu ami fó hatene ba ami-nia ministra edukasaun  bele karik iha ezame nasionál ne’e ramata, bele haruka sira-nia ekipa ne’ebé toma konta iha área konstrusaun nian bele mai hadi’a lalais ami-nia eskola ne’ebé aat, bainhira tama fali ba tinan foun ami bele utiliza fali.

Jornalista : Nelia Fernandes
Editór        : Rafy Belo

HAKEREK NO HATÁN

Please enter your comment!
Please enter your name here