Família sira partisipa misa requiem eis Ministru Defeza, Cirilio José Jacob Valadares Cristóvão iha Igreja Balidi, Dili, kuarta (24/10/2019). Imajen/Eugénio Pereira

DILI, 23 outubru 2019 (TATOLI)-Hafoin selebra misa requiem iha Igreja Balidi, Dili, horiseik, família, parente no amigu sira lori kedas mate isin eis Ministru Defeza, Cirilio José Jacob Valadares Cristóvão, ba nia knua maris fatin, Aldeia Titilari, Suku Fuiloro, Postu Administrativu Lospalos, Munisípiu Lautem.

Notísia Relevante : Eis Ministru Cirilio Fó Kontribuisaun Makas ba Setór Defeza ho SNI

Mate isin eis Ministru Defeza, Cirilio Cristovão transporta ona ba nia knua moris fatin Aldeia Titilari, Suku Fuiloro, Postu Administrativu Lospalos, Munisípiu Lautem, kuarta (23/10/2019). Imajen/Eúgenio Pereira

Liuhosi serimónia misa ne’e, padre selebrante, Graciano dos Santos Barros, dehan, moris ne’e hanesan  grasa ida ne’ebé oferese hosi Aman Maromak ba ema hotu-hotu iha mundu. Hanesan ezemplu, bainhira bebé ida atu moris, família inklui viziñu hotu hatene ninia data no oras moris nian. Maibé, vida mate, ne’e hanesan mistériu ida, úniku Na’i Maromak de’it maka bele hatene.

“Moris ne’e ita hanesan mistériu ida ita la hatene aban ou bainhira maka ita mate. Señor Cirilio, loron sira liu ba,  ita sei haree hela nia ho ita kontente, ohin, ita haree de’it nia mate isin,” hateten Amu Graciano dos Santos Barros.

Mate, tuir Amu Graciano dos Santos, la’ós destinasaun ikus ba ema, tanba  mate depois sei moris hi’as aas liu iha Reinu Lalehan ho Aman Maromak, hanesan Na’i Jesus Kristu prova ona ba sarani hotu katak, Lalehan ne’e iha duni.

 Amu Graciano dehan, buat di’ak hirak ne’ebé matebian halo durante nia asume kargu oin-oin too hakotu iis sai de’it hanesan memória furak ba Timor-oan sira hodi lembra no halo fila buat di’ak hodi kontribui ba nasaun ne’e.

Misa agradesimentu ne’e partisipa mós hosi eis Primeiru-Ministru, Kay Rala Xanana Gusmão ne’ebé tinan barak besik no koñese di’ak matebian presta mós omenajen hodi hato’o kondolénsia ba família.

Tuir ajenda too iha Lospalos  sei hein too loron tolu hodi hala’o rituál tuir Uma Lisan “Cunu Ratu” no iha sábadu (25/10) mak hala’o serimónia funerál iha Aldeia Titilari.

Parte seluk, reprezentante Família Uma Lisan “Cunu Ratu”, Horácio Dos Santos  mós husu deskulpa ba família boot, Ministériu Defeza no Serbisu Nasionál Intelijénsia (SNI) kona-ba prosesu mate isin eis Ministru Defeza ne’e la konsege lori ba presta omenajen iha edifísiu rua ne’e tanba tempu la permite.

 Matebian Cirilio nu’udar oan mane boot hosi maun alin na’in tolu ne’ebé moris hosi aman, Tomás José Cristóvão (matebian) no inan Maria Madalena (matebian).

 Jornalista     : Eugénio Pereira

Editór              : Francisco Simões

HAKEREK NO HATÁN

Please enter your comment!
Please enter your name here