Vise-Xefe Bankada FRETIlIN, Francisco Miranda Branco. Imajen/Tatoli.

DILI, 23 outubru 2019 (TATOLI) – Vise-Xefe Bankada Frente Revolusionária Timor-Leste Independente (FRETILIN), Francisco Miranda Branco, konsidera diálogu entre líder sira importante atu bele ultrapasa situasaun impase iha rai-laran.

“Ami sempre promove diálogu hanesan instrumentu ida ne’ebé di’ak liu atu rezolve no ultrapasa situasaun ne’ebé de’it, tanba ne’e parte hotu tenke promove diáogu hanesan instrumentu ida importante iha ita-nia sosiedade laran. Diálogu akontese husi parte ami-nian maibé parte seluk lakohi halo diálogu”, tenik Branco sira iha resintu Parlamentu Nasionál (PN), kuarta ne’e.

Tuir Deputadu Opozisaun ne’e, diálogu nesesáriu ba kualker situasaun iha mundu tomak, maibé realidade iha Timor-Leste iha ema balun promove diáogu enkuantu seluk kestiona katak diálogu la hakerek iha Kontituisaun, maski nasaun ida bainhira hakarak situasaun di’ak presiza halo diálogu.

Nia la konkorda ho deklarasaun Primeiru-Ministru, Taur Matan Ruak, ne’ebé dehan bainhira laiha solusaun ba membru governu indijitadu hodi hetan pose, maka di’ak liu iha tan Eleisaun Antesipada (EA).

Deputadu ne’e konsidera, bainhira atu konvoka EA iha momentu ne’e la nesesáriu tanba ne’e líder polítiku sira tenke iha kapasidade atu rezolve problema iha rai-laran

“Ida-ne’e hanesan teste ida  ba lideransa nasaun sira-nia kapasidade atu rezolve problema Sosiál Ekonomiku, no Polítiku”, nia akresenta.

Branco hatutan: “Ba problema sira ne’ebé mosu, ida ne’e la’ós buat fásil  ita deklara atu halo Elesisaun Antesipada. Ita mós tenke sukat saida maka impaktu ba moris povu-nian”.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here