Primeiru-Ministru, Taur Matan Ruak, prezide Reuniaun Konsellu Ministru iha Palásiu Governu, Dili, Kuarta (23/10/2019). Imajen TATOLI/Egas Cristovão

DILI, 23 outubru 2019 (TATOLI) – Ministru Reforma Lejizlativa no Asuntu Parlamentár, Fidelis Leite Magalhães, hamutuk ho ninia ekipa, aprezenta diploma tolu iha reuniaun Konsellu Ministru (KM).

Ministru Estadu Prezidénsia Konsellu Ministru, Hermenegildo Augusto Cabral Pereira, informa diploma hirak ne’e atu haree kona-ba aprovasaun fleksibilidade no alterasaun relevante ba Proposta Lei, ne’ebé atu hatún ba Parlamentu Nasionál (PN), liliu fleksibilidade Governu atu halo alterasaun ba Kódigu Prosesu sivíl.

“Ida maka rejime jurídiku ba arbitrájen voluntária no autorizasaun lejizlativa, katak husu Parlamentu fó autorizasaun em vez de Parlamentu maka halo maibé Konsellu Ministru maka halo ho autorizasaun Parlamentár, atu halo alterasaun ba Kódigu Prosesu Sivíl”, nia tenik iha Palásiu Governu, kuarta ne’e.

Proposta Lei ne’ebé hetan aprovasaun husi KM ne’e, atu garante no hasa’e kualidade no fortalesimentu husi sistema administrasaun justisa atu bele oferese servisu juridisionál ba sidadaun hotu ne’ebé asegura rezolusaun objetiva, imparsiál, ekitativa, útil no efisiente ba disputa.

Diploma seluk husi Ministériu Reforma Lejizlativa no Asuntu Parlamentár (MRLAP), kona-ba Proposta Rezolusaun ba PN.

“Seluk mak adezaun Timor-Leste ba Konvensaun Nova Iorke iha tinan 1958, kona-ba rekoñesimentu ezekusaun sentensa arbitrál iha rai li’ur, la’ós iha Timor-Leste. Ida-ne’e atu sentensa sira ne’ebé Tribunál Arbitrájen hola karik, relasaun ho kontratu ne’ebé ezekuta projetu iha Timor-Leste, bele iha kobertura no obrigasaun atu azekuta”, Ministru Hermenegildo subliña.

Nune’e, partisipasaun iha Konvensaun Nova Iorke konstitui pilár esensiál husi arbitrájen internasionál, ne’ebé maka ratifika husi nasaun hamutuk 161.

Timor-Leste rasik konstitui ona insentivu importante ba intensifikasaun husi relasaun komersiál ho esteriór sira hanesan fatór promosaun investimentu estranjeiru.

Diploma ikus husi MRLAP, ne’ebé aprezenta iha reuniaun ezekutivu sira maka regulamentu ba KM rasik.

“Regulamentu ne’e prosesu ne’ebé kle’ur, tanba agora sei opera ho rejimentu Konsellu Ministru VI Governu ninian no ohin aprova rejimentu VIII Governu ninian, hodi halo servisu Konsellu Ministru nian efisiente no efikáz, hodi bele regula di’ak liután interasaun entre ministériu hodi aprovasaun ba diploma, polítika, no rezolusaun sira, atu bele iha efisiénsia no kualidade aas liután”, dehan governante ne’e.

Proposta Rezolusaun Governu ne’ebé aprovadu, atu halo revizaun ba rejimentu hodi bele reforsa iha momentu desizaun lejizlativa, ho forma bele kumpre Orgánika Governu ho sentidu reforsa kontrolu polítiku husi KM, kona-ba atividade husi reforma lejizlativa, espesiál husi Primeiru-Ministru iha ninia ezersísiu podér husi diresaun ba asaun Governu nian.

Jornalista: Julia Chatarina

Editór:  Xisto Freitas

HAKEREK NO HATÁN

Please enter your comment!
Please enter your name here