Prezidente Repúblika Indonézia, Joko Widodo (karuk) no Vise-Prezidente, Ma’ruf Amin (loos). Imajen/Espesiál

DILI, 23 outubru 2019 (TATOLI) – Governu Timor-Leste felisita tomada pose Prezidente Repúblika Indonézia, Joko Widodo no Vise-Prezidente, Ma’ruf Amin, ba mandatu períudu 2019 to’o 2024.

Mensajen votu susesu ne’e, aprova liuhosi reuniaun Konsellu Ministru, kuarta (23/10), ba tomada pose ne’ebé realiza iha loron 20 outubru 2019.

“Governu Repúblika Demokrátika Timor-Leste (RDTL) hato’o ksolok boot ba Prezidente Repúblika Indonézia, Joko Widodo no Vise-Prezidente, Ma’ruf Amin, ba pose ne’ebé sira simu ona. Husu atu sira hetan susesu di’ak iha kargu boot ne’ebé sira simu ona atu dezempeña”, haktuir mensajen Governu ne’ebé divulga liuhosi portál ofisiál, iha kuarta ne’e.

Subliña tan, “Timor-Leste no Indonézia fahe relasaun no kooperasaun, solidariedade no prosimidade ne’ebé forte iha ambiente verdade no amizade nu’udar ezemplár ida ne’ebé importante tebes ba konsolidasaun estabilidade no seguransa ne’ebé nesesáriu ba dezenvolvimentu nasaun rua nian”.

Liuhosi mensajen ne’e, Governu konsidera, relasaun sira ne’ebé durante ne’e la’o, hatuur iha lasu istóriku, ekonómiku no kulturál sira ne’ebé forte, no hatuur mós iha prezensa husi komunidade sira ne’ebé dinámika no mós integrada iha sosiedade rua ne’e.

“Timor-Leste asume kompromisu ida ne’ebé forte atu hakle’an relasaun amizade fraterna ne’ebé kesi Povu sira husi nasaun rua ne’e, iha ámbitu bilaterál no multilaterál oioin durante mandatu ne’ebé mak agora hahú”, akresenta.

Hafoin simu pose iha loron 23 outubru, Prezidente Joko Widodo fó pose ba ministru na’in-34, inklui pesoál haat ho nível ministru, ne’ebé sei ajuda iha ninia gabinete.

Ba mandatu períudu daruak hanesan Xefe Estadu daualuk, Joko Widodo hanaran ninia ekipa traballu ba períudu ne’e ho “Kabinet Indonesia Maju”.

Iha seremónia tomada pose, partisipa husi  Xefe Governu no Vise-Xefe Estadu husi nasaun sia no mós delegasaun espesiál husi nasaun hitu.

Husi parte Timor-Leste, Prezidente Repúblika, Francisco Guterres ‘Lú Olo’ hetan konvite ba seremónia ne’e.

Jornalista: Julia Chatarina

Editór : Xisto Freitas

HAKEREK NO HATÁN

Please enter your comment!
Please enter your name here