Bandeira FRETILIN.

DILI, 23 outubru 2019 (TATOLI)–Bankada Partidu Frente Revolusionária Timor-Leste Independente (FRETILIN) ezije Parlamentu Nasionál atu aselera Lei Antí-Korrupsaun (LAK).

Projetu Lei Antí-Korrupsaun Bankada Parlamentár FRETILIN ho Partidu Demokrátiku submete ba meza Parlamentu Nasionál iha outubru 2018 liubá. Oras ne’e daudaun, Komisaun A Parlamentu (trata Asuntu Justisa, Konstitusionál no Podér Lokál) nian mak diskute hela lei ne’e, ne’ebé to’o ona iha faze espesialidade.

“Bankada FRETILIN hakarak reitera ami-nia prontidaun no hakarak di’ak tomak atu serbisu hamutuk ho bankada sira seluk iha Parlamentu Nasionál atu finaliza no aprova lalais Lei Antí-Korrupsaun atu garante katak kombate korrupsaun bele sai di’ak liu iha ita-nia rain”, hateten Bankada Parlamentár FRETILIN liuhosi komunidade imprensa ne’ebé TATOLI asesu, kuarta ne’e.

Lee mós: PPN Iha Esperansa Bele Finaliza Lei Anti-Korrupsaun Tinan Ne’e

Tuir bankada FRETILIN katak prestasaun serbisu Parlamentu Nasionál iha tinan fiskál ida-ne’e la produtivu liu. Sesaun Plenária sira mukit ajenda, barak liu mak prenxe de’it ho períodu antes da ordem do dia. Sesaun plenaria sira barak liu mak hala’o iha parte dadeer de’it, no hafoin oras meiudia iha loron segunda ho tersa sira, Parlamentu la funsiona ka la hala’o kna’ar ruma.

Iha komunikadu ne’e mós haktuir katak Parlamentu nia tinan lejizlativa no tinan fiskál ida-ne’e, Parlamentu Nasionál la hamosu projetu lei ruma hodi apresia no aprova iha tinan ida-ne’e tomak.

“Únika projetu lei ne’ebé Parlamentu Nasionál apresia hela daudaun ne’e mak projetu Lei Antí-Korrupsaun,” komunikadu ne’e mensiona.

Molok ne’e, Prezidente Komisaun A, Carmelita Caetano Moniz, hateten kontinuasaun diskusaun LAK presiza tempu tanba sei ajusta ho referénsia balun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here